Hewlêr (Rûdaw) - Weşanên DOZê du berhemên biyografîk û yên hevpeyvînan ên nû li pirtûkxaneya Kurdî zêde kirin.
Her du berhem ji aliyê lêkolîner Newzad Elî Ehmed ve hatibûn amadekirin û bi Kurmancî hatin çapkirin.
Jineke Swêdî di nav refên pêşmergeyan de
Berhema yekem a bi navê "Agneta Kling: Di Nav Refên Pêşmergeyan De Jineke Swêdî" ji Erebî ji aliyê Bernas Qerejdaxî ve hatiye wergerandin.
Berhema duyem jî bi navê "Omer Şêxmûs: Bizota Di Bin Xweliyê De" Yasîn Hisên ji Soranî kiriye
Her du berhem belgenameyên dîrokî ne û hûrgiliyên têkoşîna Kurdan a li çar parçeyên Kurdistanê li xwe digirin.
Di her du berheman de jî bi zimanekî zelal qonaxên dîrokî, serpêhatî û biyografiya Agneta Kling û Omer Şêxmûs tên vegotin.
"Min soza xwe bi cih anî"
Newzad Elî Ehmed di nivîsa paşberga "Agneta Kling" de wiha dibêje:
"Agnetayê nedixwest li ber çavan be û hez nedikir li ser têkoşînê biaxive ku di wê demê de pê re rûbirû maye. Demeke dirêj e min dixwest pirtûkekê li ser jiyana wê binivîsim.
Ew di çandeke wisa de dijiya ku cuda bû û dûrî jîngeha wê bû. Min gelek hewl da ku ez li ser jiyana wê binivîsim û tevî gelek zehmetiyan bi sebir xebitîm.
Me bernameyek çêkir û her cara ku ez diçûm Swêdê, min pê re hevpeyvînek dikir.
Her çend me nekarî em projeya xwe temam bikin jî, min soza xwe bi cih anî û tiştên ku min di vî warî de kirine diweşînim. Ez vê pirtûkê diyarî giyanê wê yê birûmet dikim."
Jina arîstokrat navê "Tara" girt
Agneta Kling ji malbateke navdar bû, ew xwedî karaktereke bihêz, aram û arîstokrat a Swêdê bû.
Wê di şoreşa nû de li çiyayên Kurdistanê, li kêleka hevjînê xwe Omer Şêxmûs di nav refên pêşmergeyan de cih girt.
Agneta, li çiyayan fêrî perwerdehiya çekan bûbû.
Navê ku lê kiribûn "Tara" bû û hevalên wê jê re digotin "Xwişka Tara".
Omer Şêxmûs: Şahidê dîroka nêzîk a Kurdan
Ji nivîsa paşberga pirtûka "Omer Şêxmûs" jî ev agahî tên dayîn:
"Li navenda vê berhemê çîroka jiyana Omer Şêxmûs heye. Ew kesayetiyekî girîng û şahidê dîroka nêzîk a tevgera siyasî ya Kurdan e.
Ev pirtûk di heman demê de balê dikişîne ser veguherîna têkoşîna berdewam a miletê Kurd a li her çar parçeyên Kurdistanê.
Şêxmûs sala 1942yan li Rojavayê Kurdistanê li bajarê Amûdê ji dayîk bûye.
Wî bi tevlîbûna xwe ya di nav tevgerên xwendekar û siyasî yên Kurd de ji destpêka temenê xwe yê ciwaniyê ve, têkoşîna xwe ya ji bo nasname û azadiyê li diyasporayê domandiye."
Rola wî ya dîplomatîk di YNKyê de
Ji bilî çalakiyên xwe yên siyasî û rewşenbîrî yên li Ewropa û Amerîkayê, ew endamekî damezirîner ê Yekîtiya Niştimanî ya Kurdistanê (YNK) bû.
Her wiha roleke wî ya girîng di bidestxistina rewatiya navneteweyî ya partiyê de hebû, bi taybetî bi berpirsyariyên xwe yên di warê têkiliyên derveyî de.
Şêxmûs ji sala 1978an û pê ve ji bo komîteya navendî ya YNKyê û paşê jî ji bo Polîtburoya wê hatiye hilbijartin.
Wî hem bi rêya hewldanên dîplomatîk û hem jî bi çalakiyên xwe yên li Başûrê Kurdistanê, di asta sazî û rêxistinî de alîkariya têkoşîna neteweyî ya Kurdan kiriye.
Bi kurtasî, ev pirtûk bi rêya jiyana Omer Şêxmûs a siyasî, ji bo têgihiştina dînamîkên guherbar ên tevgera Kurdan, avahiyên wê yên rêxistinî û şêweyên têkoşînê yên li diyasporayê çarçoveyeke hêja pêşkêş dike.
Di heman demê de armanc dike ku ji biyografiyeke kesane wêdetir biçe û beşeke bêhempa ya dîroka Kurd a nûjen belge bike.
