Hewlêr (Rûdaw) - Donald Trump berî gera nû ya dan û standinên aştiyê yên li Pakistanê rasterast bangî serkirdeyên Îranê kir û xwest ku 8 jinên ku cezayê îdamê wergirtine werin berdan.
Serokê Amerîkayê Donald Trump ev gav wekî "nîşaneya niyeta baş" a ji bo pêvajoya dîplomatîk a di navbera Washington û Tehranê de pênase kir.
Trump li ser hesabê xwe yê Truth Socialê nûçeyên li ser amadehiya Îranê ya ji bo bidarvekirina 8 jinan parve kir û got:
"Ez bangî serkirdeyên Îranê dikim ku dê di demeke nêzîk de bi nûnerên min re li ser maseya dan û standinan rûnin.
Ez dê ji berdana van jinan gelekî kêfxweş bibim.
Ez bawer im ev gava we dê bi rêzeke mezin were pêşwazîkirin.
Ji kerema xwe zererê nedin wan! Ev dê ji bo dan û standinên me bibe destpêkeke gelekî baş."
Navên di lîsteya îdamê de û tohmet
Rêxistina civakî ya bi navê Lawfare Project a li New Yorkê navên wan 8 jinan eşkere kirin.
Ew jin Bita Hemmatî, Xezal Qeledarî, Gulnaz Neraxî, Venus Hisên Nejad, Penah Movahedî, Ensieh Nejatî, Mehbûbe Şebanî û Diana Tahir Abadî ne.
Hat diyarkirin ku Bita Hemmatî jina ewil e ku ji ber xwenîşandanên dawiyê li Îranê cezayê îdamê wergirtiye.
Hemmatî meha Kanûna Paşîn li Tehranê bi teşwîqkirina serhildana li dijî pergalê hatibû tohmetbarkirin.