Hewlêr (Rûdaw) - Li parêzgehên Sêrt û Mêrdînê yên Bakurê Kurdistanê barana zêde û lehiyê bandoreke neyînî li jiyanê kir.
Li her du parêzgehan gelek mal û kargeh di bin avê de man û zerereke mezin çêbû.
Li Mêrdînê welatî hatin rizgarkirin
Li navçeya Midyadê ya Mêrdînê ji ber barana zêde li taxên Baglar, Ulucamî, Yunus Emre û Yeniyê lehî rabû. Hinek mal û kargeh di bin avê de man.
Hinek welatiyên ku ji ber lehiyê di malên xwe de asê mabûn, ji aliyê tîmên Şaredariya Midyadê û agirvemirandinê ve hatin rizgarkirin.
Tîman ji bo derxistina ava ku li mal, kargeh û kolanan kom bûbû dest bi xebatan kir.
Tîmên Şaredariya Bajarê Mezin a Mêrdînê û Birêveberiya Giştî ya Av û Kanalîzasyonê ya Mêrdînê (MARSU) jî bi makîneyên kar piştgiriyê didin xebatan.
Li Sêrtê pez mirin û pirek xera bû
Li navenda Sêrtê û navçeya wê Misircê jî ji ber barana zêde lehî rabû.
Li navenda Sêrtê li taxên Kooperatîf, Alan û Algulê qatên jêrzemînê yên hinek mal û kargehan di bin avê de man.
Li ser agahdarkirinê tîmên agirvemirandinê û AFADê çûn herêmê û dest bi xebatên derxistina avê kir.
Pira Kezerê ya li ser Çemê Kezerê jî ji ber barana zêde xera bû.
Li taxên Sumer û Tekelê yên Misircê kolan di bin avê de man û hinek rê xera bûn.
Li Taxa Sumerê av ket du axuran, hinek pez mirin û êm û kayê zerer dît.
Qaymeqamê Misircê Samet Serin li herêmên ku lehî lê rabûye lêkolîn kirin.
252 caran banga alîkariyê hat kirin
Li gorî daxuyaniya Parêzgariya Sêrtê, heta saet 02:00yan ji navend û navçeyan welatiyan ji bo lehiyê 252 caran bangî Navenda Banga Bilez a 112an kir.
Li ser bangan ji AFAD, Îdareya Taybet, Şaredariya Sêrtê, Karên Avê yên Dewletê (DSI) û Rêyên Bejahî gelek tîm û wesayît çûn herêmê.
Her wiha tîmên ewlehî, cendirme û tenduristiyê jî piştgirî da xebatan.
Parêzgariya Sêrtê: Em dê piştgiriya welatiyan bikin
Parêzgarê Sêrtê Kemal Kizilkaya li ser Pira Kezerê ya ku xera bûye û herêmên di bin rîska lehiyê de ne lêkolîn kirin û ji rayedaran agahî wergirtin.
Kemal Kizilkaya diyar kir ku di navbera saet 03:00 û 05:00an de li ser metrekareyekê 30 heta 97 kîlogram baran bariyaye.
Kizilkaya da zanîn ku wan ji bo ewlehiyê Pira Kezerê ji trafîkê re girtiye û çûn û hatin di ser pira nû re tê kirin.
Parêzgarê Sêrtê anî zimên ku pêşîniya wan derxistina avê û tespîtkirina zererê ye û got, "Piştî ku tespît xelas bûn em dê piştgiriya pêwîst bidin welatiyên xwe."
