Hewlêr (Rûdaw) - Tulay Hatîmogullariyê ragihand ku ji ber pêşhatên li herêmê û metirsiya şer, êdî ne dema sistkirina pêvajoyê ye.
Tulay Hatîmogullariyê diyar kir ku çareserkirina Pirsgirêka Kurdan ji bo Tirkiyeyê neçariyeke herî bilez û jiyanî ye û got, “Divê em di pêvajoyê de ne frenê, pê li gazê bikin.”
Hevseroka Giştî ya Partiya Gelan a Wekhevî û Demokrasiyê (DEM Partî) Tulay Hatîmogullari ji bo beşdariya civîna "Seferberiya Pêşverû ya Cîhanî" ya li bajarê Barcelonayê yê Birêvebiriya Xweser a Katalonyayê ya Spanyayê ye.
Di vê civînê de zêdetirî 4 hezar serkirde, akademîsyen û nûnerên partiyên sosyalîst û demokrat ên cîhanê amade ne.
Hatîmogullariyê li ser pêvajoya çareseriyê û krîzên li Rojhilata Navîn nirxandinên girîng kirin.
Mifteya parastinê: Çareseriya aştiyane
Tulay Hatîmogullariyê bal kişand ser bandora şerê Amerîka û Îranê ya li ser hevsengiyên herêmê û got ku ev rewş nîşan dide ku cîhan di bin gefa atomî de ye.
Hatîmogullariyê ragihand ku di demekê de ku Rojhilata Navîn wekî beroşekê dikele, çareserkirina aştiyane ya Pirsgirêka Kurdan dê ji bo Tirkiyeyê bibe destkefta herî mezin û mifteya parastinê.
Hevseroka DEM Partiyê bi bîr anî ku rapora Komîsyona Hevgirtina Neteweyî, Biratî û Demokrasiyê pêşkêşî Parlamentoya Tirkiyeyê hatiye kirin.
Wê got ku niha gel li benda derxistina yasayan e ku pêvajoya bêçekkirinê bigihêje encamê.
Tulay Hatîmogullari destnîşan kir ku ji bo serkeftina pêvajoyê divê statuya Abdullah Ocalan wekî "mixetabê sereke û dan û standinkar" di çarçoveyeke yasayî û hiqûqî de were naskirin.