Mûşekeke Îranê li asman / Wêne: Arşîv
Hewlêr (Rûdaw) - Supaya Pasdaran a Îranê ragihand ku wan pêla 20î ya êrişên xwe yên li berjewendiyên Amerîkayê yên li herêmê û Îsraîlê daye destpêkirin.
Supaya Pasdaran diyar kir ku operasyon tevlîhev e û bi dron û mûşekan tê kirin.
Pêwendiyên Giştî yên Supaya Pasdaran îro daxuyaniyek belav kir.
Di daxuyaniyê de hat ragihandin ku pêla 20î ya operasyona "Soza Rast a 4an" dest pê kiriye.
Operasyona "Soza Rast a 4an"
Li gorî daxuyaniyê, êriş bi dirûşma ''Ya Muiz El-Muminîn'' tên kirin.
Ew êriş bi awayekî ''tevlîhev, berfireh û curbicur'' li berjewendiyên Amerîkayê yên li herêmê û çendîn armancên li nav axa Îsraîlê tên kirin.
Tolhildana keştiya Denayê
Di daxuyaniyê de her wiha hat destnîşankirin ku ev pêla êrişan a ku bi dron û mûşekan tê kirin, wekî tolhildana têkşikandina keştiya şer a Îranê ''Dena''yê ye.
Keştiya Denayê di encama êrişeke Amerîkayê de li peravên Srî Lankayê hatibû armanckirin û zêdetirî 80 leşkerên Hêzên Deryayî yên Îranê tê de hatibûn kuştin.
Şerê di navbera Amerîka-Îsraîl û Îranê de 28ê Sibata 2026an dest pê kiriye û heta niha didome.
