Hewlêr (Rûdaw) - Balafirgeha Îmam Xumeynî ya ku balafirgeha herî mezin a Îranê ye, piştî rawestandina 50 rojan, careke din ji geştên asmanî re hat vekirin.
Destpêkirina geştan a piştî şerekî dijwar, bû sedem ku malbat dîsa bi hev şa bibin.
Jina bi navê Nergizê li ser hestên xwe got:
"Ez diçim Stenbolê da ku keça xwe ziyaret bikim. Ew xwendekar e.
Dema ku şer gelekî dijwar bû, me nedikarî em pêwendiyê bi hev re deynin ji ber ku înterneta me nebû.
Ez pir kêfxweş im ku geştan dîsa dest pê kir."
Geşt sînordar in
Destpêkirina geştan sînordar e û qonax bi qonax tên kirin.
Di qonaxa yekem de dê geştên asmanî ber bi Medîne, Mesqet û Stenbolê ve bin.
Geşt hatine destpêkirin lê hîn gumanên xelk û geştiyaran li ser agirbestê hene.
Xortê bi navê Hesen hestên xwe yên derbarê mijarê de wiha anîn zimên:
"Em ji şer gelekî dilgiran in. Beriya çend şevan me li Tehranê dengên bilind bihîstin. Kes nizane dê çi bibe."