Hewlêr (Rûdaw) - Agirbesta di navbera Îran û Amerîkayê de li Rojhilatê Kurdistanê bû sedema bêdengiyeke aloz.
Li gorî nûçegihanê Rûdawê yê li Rojhilatê Kurdistanê, xelk di pêvajoya agirbesta nazik de di bin nediyariyeke kûr û zexteke giran a aboriyê de dijî.
Di rojên beriya agirbestê de li Rojhilatê Kurdistanê jiyana rojane bi temamî li gorî îhtimala şer hatibû guhertin.
Bi tirsa ku bibin armanca operasyonên Amerîka û Îsraîlê yên ku dawiya meha Sibatê dest pê kiribûn, kolanên nêzîkî tesîsên leşkerî û ewlehiyê hema bêje bi temamî vala bûbûn.
Êrişên gengaz ên li ser binesaziya enerjiyê, fikarên qutbûna elektrîk, gaz û avê gihandibûn lûtkeyê.
Piştî ultîmatomên tund ên Serokê Amerîkayê Donald Trump ên li dijî Îranê, gelek welatiyan berê xwe dabû sîstemên enerjiya rojê û stokkirina sotemeniyê.
Rewşa piştî agirbestê
Agirbesta du hefteyî ya ku 8ê Nîsanê hat ragihandin destpêkê bû sedema aramiyekê lê ev hest di demeke kurt de cihê xwe da fikara ji bo paşerojê.
Tevî agirbestê liv û tevgera leşkerî û zextên li herêmê didomin.
Hêzên ewlehiyê li ser kolan û qadên sereke hatine bicihkirin, gelek ji wan di wesayîtên xwe de radizên û bi vî rengî atmosfera şer zindî dihêlin.
Dibistan perwerdeya online didomînin, zanîngeh hîn jî girtî ne.
Ji ber kêmkirinên înternetê, xelk ji bo wergirtina nûçeyan girêdayî televîzyonên fermî bûye.
Her çend çalakiyên aborî qismen dest pê kiribin jî di bazarê de rawestan didome.
Her çend li kolanên ku berê vala bûbûn trafîk dîsa zêde bibe jî, xelk xerckirinên xwe tenê bi pêdiviyên bingehîn sînordar dike.
Sîrwanê sandwîçfiroşê ku ji ber sedemên ewlehiyê nasnav bi kar tîne, diyar kir ku ew hêvî dike agirbest ne mayînde be û nêrîneke balkêş pêşkêş kir.
Sîrwan diyar kir ku "berdewambûna şer derfetek e ji bo destpêkirina serhildana gel a li dijî birêvebiriya niha û bidawîanîna desthilatdariya Îranê".
Lê belê ew qebûl dike ku tirsa şer gelê hejar dixe nav tirsê.
Sîrwan lê zêde dike ku kolan qerebalix bûne lê mirov ditirsin pereyan xerc bikin, ji ber vê yekê firotin gelekî kêm in.
Tê çaverêkirin ku serdemeke dirêj a bêîstiqrariyê hebe
Cawfiroş Elî jî heman nêrînê parve dike û destnîşan dike ku qerebalixiya li sûkê venaguhere firotinê û diyar dike ku agirbest ew matmayî nekiriye û ew li bendê ye ku serdemeke dirêj a bêîstiqrariyê hebe ku dikare bibe sedema hilweşîna rejîmê.
Di demekê de ku bihabûna cidî ya xwirekê malbatan dixe nav zehmetiyê, li bazarên xwecihî serdestiya berhemên ku ji Tirkiye û Herêma Kurdistanê tên hawirdekirin zêde dibe.
Sûka xaniyan jî bi temamî rawestiyaye.
Emlakdar Wirya dibêje, her çend xanî û erd gelekî biha bûbin jî, ti miamele nayên kirin.
Wirya diyar dike ku kiryar hene lê kes naxwaze milkê xwe bifiroşe û gilî dike ku tevî şert û mercên şer xwediyên xaniyan kirêyan kêm nakin.
Wirya tîne zimên ku xwediyên xaniyan hewl didin bihabûna jiyanê bixin stûyê kirêdaran.