Tehran / Wêne: AFP
Hewlêr (Rûdaw) - Heyva Sor a Îranê ragihand ku hejmara kesên di êrişên Amerîka û Îsraîlê yên li Îranê de hatine kuştin gihîştiye 787an û êrişan bandor li 153 bajarokan kiriye.
Heyva Sor a Îranê amarên herî dawî yên êrişên Amerîka û Îsraîlê belav kirin
Li gorî daxuyaniya hejmar 5 a Heyva Sor a Îranê, tîmên meydanî amarên dawî bi vî rengî eşkere kirin:
Tevahiya kuştiyan: 787 kes
Hejmara êrişan: 1039 êriş
Deverên hatine hedefgirtin: 504 dever
Di daxuyaniyê de hat diyarkirin ku niha operasyonên lêgerîn û rizgarkirinê, rakirina kavilan, veguhastina birîndaran û pêşkêşkirina xizmetguzariya tenduristiyê berdewam dikin.
Ev amar di çarçoveya şerê ku di çend rojên borî de gur bûye de hatin dayîn.
Êrişên Amerîka û Îsraîlê
Ji 28ê Sibata 2026an ve, Amerîka û Îsraîlê li parêzgehên Îran û Rojhilatê Kurdistanê dest bi êrişeke hevpar û berfireh kiriye.
Van êrişan tenê baregehên leşkerî nekirine hedef, her wiha bûne sedema kuştina gelek berpirsên bilind ên Komara Îslamî, di nav wan de Rêberê Bilind ê Şoreşa Îslamî ya Îranê Elî Xamineyî jî heye.
Li hemberî vê yekê, Supaya Pasdaran a Îranê rêzeêrişên mûşekî û dronî li Îsraîlê û berjewendiyên Amerîkayê yên li welatên Kendavê pêk anîn.
