Hewlêr (Rûdaw) - Endamekî Komîteya Navendî ya Komeleya Şoreşger a Zehmetkêşên Kurdistanê ya Îranê (Komele) ji Rûdawê re diyar kir ku ji ber êrişan Pêşmergeyê wê yê bi navê Ako Rehîmî canê xwe ji dest daye.
Serkirdeyê Komeleyê ji Nûçegihanê Rûdawê Pêşewa Bextiyar re got, “Di bombebarana îşev a Zirgiwêzê ya li Silêmaniyê Pêşmergeyek şehîd ket."
Li gorî wan zanyariyên ku ketine destê mûçegihanê Rûdawê, navê wî Pêşmergeyê ku canê xwe ji dest daye Ako Rehîmî ye û xelkê bajarê Seqizê ye.
Li aliyê din, Komeleyê jî derbarê êrişê de daxuyaniyek belav kir û got:
"Di rojên borî de çend caran yek ji kampên me yên li Zirgiwêzê bû armanca çend mûşekan, di encamê de mixabin Pêşmerge û endamekî me yê dilsoz û têkoşer ê bi navê Îsmaîl Rehîmî yê bi nasnavê Ako ku xelkê bajarê Seqizê ye, tevlî karwanê şehîdên Komele û Kurdistanê bû."
Her wiha Komeleyê amaje bi wê yekê jî dike ku birîndarekî wan jî heye û got, "Bi kêfxweşî rewşa wî ya tenduristiyê baş e."