Hewlêr (Rûdaw) - Eşkere bû ku Omer Ketê ku li navçeya Siwêregê ya parêzgeha Rihayê êrişî dibistanekê kir, 16 kes birîndar kir û paşê xwe kuşt, rojek beriya bûyerê hatibûye desteserkirin lê hatiye berdan.
Li Lîseya Anadoluyê ya Pîşeyî û Teknîkî ya Ahmet Koyuncuyê ya li Siwêregê doh êrişeke çekdarî pêk hatibû.
Hûrgiliyên nû yên li ser vê êrişê derketin holê.
Li gorî zanyariyan, êrişkar Omer Ket demeke kurt beriya êrişê li ser hesabên xwe yên medyaya civakî gef xwaribûn.
Wî peyamên wekî "Dê di nav çend rojan de li dibistanê êrişek pêk bê, amade bin" û "Em dê sibe hev bibînin, ez dê we hemûyan tune bikim" belav kiribûn.
Birêvebiriya dibistanê giliyê wî kiribû
Piştî van peyamên wî, birêvebirê dibistanê agahî dabû polîsan û giliyê wî kiribû.
Li ser vê îxbarê, Omer Ket rojek beriya bûyerê hatibû desteserkirin lê belê piştî ku îfadeya wî hat wergirtin, ew hat berdan.
Omer Ketê ku hat berdan, sibeha roja din bi çekê çû dibistanê û êriş pêk anî.
Li gorî zanyariyên di dosyeya lêpirsînê de, sedema êrişê "hêrsa biserneketinê" ye.
Omer Ket ji ber nebûna li dibistanê derbasî lîseya vekirî bûbû lê li wir jî bi ser neketibû.
Hat tespîtkirin ku wî ji ber têkçûna jiyana xwe ya perwerdeyê birêvebirê dibistanê berpirsyar didît û ji ber vê yekê dijminatî dikir.