Hewlêr (Rûdaw) - Ji şeva borî heta sibeha çarşemê, êriş û bombebaranên artêşa Amerîka û Îsraîlê yên li ser parêzgehên Îranê û Rojhilatê Kurdistanê berdewam kirin.
Li bajarên Tehran, Kerec, Isfehan, Qum û Şîrazê dengê teqînên bihêz hatin bihîstin.
Navendên leşkerî yên li parêzgehên Rojhilatê Kurdistanê jî hatin armanckirin.
Nûçeyên li ser êrişa li dijî tesîsa nukleer a Netenzê ya li Isfehanê belav bûn lê medyaya fermî ya Îranê hîn ev yek piştrast nekiriye an jî red nekiriye.
Ajansa ISNAyê ragihand ku di êrişeke li ser Isfehanê de yek ji fermandarên Supaya Pasdaran Abdulhemîd Rehber û 4 leşker hatine kuştin.
Îsraîl: Me pêleke nû ya êrişan da destpêkirin
Artêşa Îsraîlê sibeha çarşemê daxuyaniyek belav kir û ragihand ku wan li nav Îranê li dijî gelek armancên cuda pêleke nû û berfireh a êrişan daye destpêkirin.
Di daxuyaniyê de hat diyarkirin ku di nava armancên vê pêla nû de "platformên mûşekan, pergalên parastina asmanî û binesaziyên din ên leşkerî yên Îranê" hene.
Hat ragihandin ku ji ber qutbûna înternet û xetên telefonê yên li Îranê, gihandina zanyariyan a ji nav welêt û Rojhilatê Kurdistanê gelekî zehmet bûye.
HRANA: 1097 sivîlan canê xwe ji dest daye
Ajansa Nûçeyan a Çalakvanên Mafên Mirovan (HRANA) ku navenda wê li Amerîkayê ye, di rapora xwe ya dawî de ragihand ku ji 28ê Sibatê ve herî kêm 1097 sivîlan li nav Îranê canê xwe ji dest daye.
Li gorî daneyên ajansê, di nava kuştiyan de 181 zarokên di bin 10 saliyê de hene.
Hejmara birîndaran jî gihiştiye 5 hezar û 402yan ku 100 ji wan zarok in.
CENTCOM: 17 keştiyên Îranê hatin îmhakirin
Fermandariya Hêzên Navendî ya Amerîkayê (CENTCOM) eşkere kir ku heta niha 17 keştiyên şer ên Îranê hatine îmhakirin û li nav Îranê êrişî 2 hezar armancan hatiye kirin.
Fermandariyê di vîdeoya li ser platforma Xê de got, "Niha li Kendavê, Tengava Hurmizê yan jî Deryaya Umanê ti keştiyên Îranê tev nagerin."
Fermandarê CENTCOMê diyar kir ku zêdetirî 50 hezar leşker, 200 balafirên şer û du keştiyên balafiran beşdarî operasyonan bûne û kapasîteya leşkerî hatiye zêdekirin.
Fermandariyê her wiha ragihand ku Îranê di êrişên tolhildanê de zêdetirî 500 mûşekên balîstîk û 2 hezar dron bi kar anîne.
Hat destnîşankirin ku pergala parastina asmanî ya Îranê lawaz maye û di êrişên Amerîka û Îsraîlê de bi sedan mûşekên balîstîk, platformên mûşekan û dronên Îranê hatine îmhakirin.