Hewlêr (Rûdaw) - Hat ragihandin ku Îranê daxwaza dirêjkirina agirbesta bi Amerîkayê re nekiriye.
Di nûçeya Ajansa Nûçeyan a Tesnîmê ya nîvfermî ya Îranê de hat diyarkirin ku ti daxwazên Îranê ji bo dirêjkirina agirbesta bi Amerîkayê re nîne.
"Dorpêç tê wateya dijminatiyê"
Di nûçeyê de her wiha hat destnîşankirin ku berdewamiya dorpêça li Tengava Hurmizê tê wateya berdewamiya dijminatiya Amerîkayê ya li hemberî Îranê.
Her wiha hat diyarkirin ku heta dorpêça deryayî bidome, Îran dê Tengava Hurmizê veneke.
Biryara Donald Trump
Serokê Amerîkayê Donald Trump ragihandibû ku wî li ser daxwaza Pakistanê biryar daye agirbestê dirêj bike.
Trump dabû zanîn ku ew dê agirbestê dirêj bikin heta ku Îran pêşniyara xwe ya li ser peymanê pêşkêş dike.