Hewlêr (Rûdaw) - Donald Trump di hilbijartinên şaredariya New Yorkê de piştgiriya xwe ya ji bo Andrew Cuomo ragihand û eger namzedê çepgir Zohran Kwame Mamdani bi ser bikeve gefa birîna budceya bajêr xwar.
Serokê Amerîkayê Donald Trump diyar kir ku Andrew Cuomo "xwedî şiyan" e ku bajêr bi rê ve bibe.
Andrew Cuomo jî di bersiva xwe de got ku Trump piştgiriya wî nake, dijberiya Zohran Kwame Mamdani dike.
Donald Trump li ser tora xwe ya civakî Truth Socialê nivîsî.
"Hûn ji Andrew Cuomo hez bikin an nekin, bi rastî ti vebijêrkeke we ya din nîne.
Pêwîst e hûn dengê xwe bidin wî û hêvî bikin ku ew karekî baş bike.
Ew xwedî şiyan e, Mamdani nîne!"
Cuomoyê ku namzedê serbixwe ye û rexnegirekî kevn ê Trump e, berê endamê Partiya Demokratan û dadgerê New Yorkê bû di bersiva vê piştgiriyê de got:
"Ew piştgiriya min nake, dijberiya Mamdani dike."
Serokê Amerîkayê berê jî ragihandibû ku eger Mamdani were hilbijartin, ew dê budceya federalî ya herî kêm ji New Yorkê re bişîne.
Li gorî rapirsiyan, Mamdaniyê ku namzedê Demokratan e, li pêşiya Cuomo ye.
Cuomo bi eslê xwe Demokrat e lê piştî ku Mamdani di hilbijartinên pêşwext ên partiyê de ew têk bir, wekî namzedê serbixwe beşdarî hilbijartinan bû.
Namzedê Komariyan Curtis Sliwa li paş maye.
Trumpê ku Komarî ye, di parvekirina xwe de piştgirî neda Sliwa û got, "Dengdana ji bo Curtis Sliwa, dengdana ji bo Mamdani ye."
Serokê Amerîkayê Donald Trump her wiha anî ziman:
"Eger Mamdani were hilbijartin, gelekî dûr e ku ez pereyên federalî bibexşînim, ji bilî wê mîqdara gelekî kêm a pêwîst."
Ev yek dubarekirina gotinên wî yên di hevpeyvîneke televîzyonî ya roja yekşemê de bû ku tê de wî Mamdani bi şaşî wekî "Komunîst" bi nav kiribû.
Bertekên Cuomo û Mamdani
Roja duşemê, Mamdani di bersiva daxuyaniyên Trump ên derbarê budceyê got:
"Ez wekî tiştê ku heye miameleyê bi wê gefê re dikim: Ew gef e, ne yasa ye.
Piştgiriya tevgera MAGAyê [aligirên Trump] ya ji bo Andrew Cuomo nîşan dide ku Donald Trump fêm kiriye ku ev dê ji bo wî bibe şaredarê herî baş.
Ne şaredarê herî baş ji bo bajarê New Yorkê, ne şaredarê herî baş ji bo New Yorkiyan, şaredarê herî baş ji bo Donald Trump û îdareya wî."
Trump di hevpeyvîna xwe ya berfireh a bi bernameya "60 Xulek" a kanala CBSyê re de gotibû ku hatina Mamdani dê wisa bike ku şaredarê berê yê çepgir Bill de Blasio "wekî kesekî hêja xuya bike".
Trump derbarê Mamdani got:
"Min dît ku de Blasio çi qas şaredarekî xirab bû û ev zilam dê ji Blasio gelekî xirabtir be."
Zohran Kwame Mamdani kî ye?
Mamdani xwe wekî sosyalîstekî demokrat dide nasîn û wan tohmetan red dike ku ew komunîst e.
Wî di hevpeyvînekê de bi henekî gotibû, "Ez wekî siyasetmedarekî Skandînavyayî me, tenê rengê min qehweyîtir e."
Eger bi ser bikeve, ew dê bibe şaredarê yekem ê Misilman û di zêdetirî 100 salan de şaredarê herî ciwan ê bajêr.
Mamdaniyê 34 salî, Cuomo wekî "bûkik û tutiyê Trump" bi nav kir û got:
"Bersiva ji bo serokatiya Donald Trump ew nîne ku em wêneyekî mîna wî li vir li şaredariyê biafirînin."
Li hemberî vê, Cuomo hewl dide xwe wekî yekane namzedê xwedî tecrube nîşan bide ku bikaribe bi îdareya Trump re mijûl bibe.
Cuomo di dema pandemiya Koronayê de dadgerê New Yorkê bû û wê demê gelek caran bi îdareya Trump re rastî pevçûnan bûbû.
Wî di hevpeyvînekê de got, "Min şerê Donald Trump kiriye. Dema ez ji bo New Yorkê şer dikim, ez ranawestim."