Bermîlên petrolê / Wêne: Pixabay
Hewlêr (Rûdaw) - Bihayê bermîlek petrola brent li bazarên navneteweyî ji sedî 1,8 daket û bermîl bi 107,68 dolaran tê kirîn û firotin.
Doh bihayê bermîlek petrola brent heta bi 119,13 dolaran bilind bûbû lê roj bi 108,65 dolarî bi dawî kir.
Bihayên îro
Bihayê bermîlek petrola brent îro saet 08:42yan li gorî dema girtinê ji sedî 1,8 daket û bû 107,68 dolar.
Di heman xulekan de, bermîlek petrola xav a cureyê Teksasa Rojava (WTI) bi 94,05 dolaran hat kirîn.
Bandora daxuyaniyên Netanyahu
Daketina bihayê petrolê piştî daxuyaniyên Serokwezîrê Îsraîlê Benjamin Netanyahu pêk hat.
Netanyahu ragihandibû ku Îsraîl ji bo vekirina Tengava Hurmizê bi "sîxurî û rêyên din" alîkariya Amerîkayê dike.
Netanyahu di konferanseke rojnamegeriyê de jî gotibû: "Dê şer ji ya ku mirov difikirin zûtir bi dawî bibe."
Welatên din jî amade ne
Li aliyê din, Fransa, Almanya, Îtalya, Japon, Holenda û Brîtanyayê jî daxuyaniyek da.
Wan diyar kir ku ew amade ne ji bo dabînkirina ewlehiya çûn û hatinê ya li Tengava Hurmizê (yek ji rêyên girîng ên bazirganiya cîhanî ye) piştgiriyê bidin hewldanên guncav.
