Hewlêr (Rûdaw) - Wezareta Petrolê ya Îraqê ragihand ku hinartina petrola Kerkûkê ya biçe bendera Ceyhanê ya Tirkiyeyê dest pê kiriye.
Wezaretê eşkere kir ku ji ber aloziyên li navçeyê û metirsiyên li ser Tengava Hurmîzê planeke wan a nû heye.
Ew plan dikin ku bi rêya Sûriye û Urdinê petrolê bişînin bazarên cîhanê.
Alîkarê Wezîrê Petrolê yê Îraqê yê ji bo Kar û Barên Derxistinê Basim Mihemed Xuzeyr îro ji Rûdawê re axivî.
Basim Mihemed Xuzeyr got, "Sipas ji Xwedê re, îro demjimêr 06:30î sibehan me bi Wezareta Çavkaniyên Xwezayî ya Herêma Kurdistanê re koordînasyon kir.
Bi vî awayî me karî bi rêya pergala Bakur careke din dest bi hinartina petrolê bike."
Alîakrê Wezîrê Petrolê da zanîn ku di qonaxa destpêkê de rojane 170 hezar bermîl petrol tê hinartin.
Xuzeyr herwiha got, "Karmendên Şîrketa Petrola Bakur û karmendên Herêma Kurdistanê bi hev re dixebitin.
Bi saya hevkariya wan, bi îzna Xwedê dê asta hinartinê rojane bigihîje 250 hezar bermîlan."
Basim Mihemed Xuzeyr eşkere kir ku ev gav di çarçoveya plana wezaretê û rênişandan serokwezîr û alîkarê serokwezîr de ye.
Armanc ew e ku ew zererên mezin werin qerebûkirin ku ji ber rawestandina pergala Bakur çêbûbûn.
SOMO: Em rêya Sûriye û Urdinê bi kar tînin
Ji aliyekî din ve, Birêvebirê SOMOyê Elî Nizar Şetrî daxuyanî da Rûdawê.
Elî Nizar Şetrî ragihand ku Wezareta Petrolê dixebite da ku hemû petrola berdest hinarde bike.
Birêvebirê SOMOyê sedema dîtina rêyên nû bi rewşa navçeyê ve girê da û got:
"Ji ber şer û pevçûnan Tengava Hurmîzê hate girtin û keştîvanî rawestiya. Ev tengav şahdemara sereke ya hinardeya Îraqê ye.
Ji ber vê yekê me tedbîrên nû girtin ber xwe."