Hewlêr (Rûdaw) - Şerê li Îranê di roja xwe ya 29an de derbasî qonaxeke nû bû.
Ji aliyê Amerîkayê ve peyamên "vê hefteyê dibe ku dan û standin hebin" bilind dibin lê Îsraîlê cara yekem rasterast navendên nukleerî yên Îranê kirin armanc.
Husiyên li Yemenê jî gef xwar ku ew dê rasterast tevlî şer bibin.
Trafîka dîplomasiyê ya Washingtonê û bombebaranên giran ên li qadê di heman demê de didomin.
Nûnerê Taybet ê Serokê Amerîkayê Donald Trump, Steve Witkoff doh li Miamiyê daxuyaniyek da.
Steve Witkoff da zanîn ku ew li bendê ne di nava vê hefteyê de bi Îranê re rûnin û anî ziman:
"Em li benda bersiva Tehranê ya ji bo plana me ya aştiyê ya ji 15 xalan pêk tê ne ku dikare hemû pirsgirêkan çareser bike."
Li aliyê din, Wezîrê Karên Derve yê Amerîkayê Marco Rubioyê ku ji bo lûtkeya G7ê li Parîsê ye daxuyaniyek da.
Rubio eşkere kir ku wan li hemberî hewldanên Îranê yên standina xercan a ji keştiyên li Tengava Hurmizê, piştgiriya tam a hevpeymanên xwe wergirtiye û got:
"Em dê di hefteyên pêşiya me de vî karî biqedînin û Îran dê ji her demê lawaztir bibe."
Navendên nukleerî û herêmên pîşesaziyê di hedefê de ne
Medyaya fermî ya Îranê ragihand ku hêzên asmanî yên Amerîka û Îsraîlê şeva borî li Îranê xalên stratejîk kirine armanc.
Di nav cihên ku hatine armanckirin de, Dezgeha Ava Giran a Xondabê, Navenda Karkirina Uranyumê ya Erdekanê û kargehên mezin ên pola yên li Xuzistan û Mubarekeyê hene.
Artêşa Îsraîlê piştrast kir ku wan li du navendên nukleerî xistiye.
Rayedarên Îranî jî parast ku li navendan ti derçûnên radyasyonê çênebûne.
Wezîrê Karên Derve yê Îranê Ebas Eraqçî got, "Îsraîl dê bedeleke giran bide. Ev êriş li dijî ruhê wê demê ne ku Trump daye dîplomasiyê."