Hewlêr (Rûdaw) - Fermandariya Navendî ya Amerîkayê (CENTCOM) diyar kir ku keştiyên wan ên şer ên mûşekavêj di Tengava Hurmizê re derbas bûne.
CENTCOMê da zanîn ku wan keştiyan niha di nav avên Kendava Ereban de dest bi erkên xwe kiriye.
Li gorî daxuyaniya CENTCOMê, ev tevgera leşkerî di çarçoveya "Projeya Azadiyê" de ye.
Armanca wê jî ew e ku piştgiriyê bide hewlên vegerandina çûn û hatina keştiyên bazirganiyê yên li herêmê.
CENTCOMê ragihand ku wekî gava yekem, du keştiyên bazirganiyê yên bi alaya Amerîkayê bi serkeftî di Tengava Hurmizê re derbas bûne.
Her wiha ev keştî bi silametî ber bi cihê xwe ve çûne.
"Projeya Azadiyê"
Ev daxuyanî di demekê de ye ku Serokê Amerîkayê Donald Trump şeva borî daxuyaniyek dabû.
Trump ragihandibû ku dê sibeha duşemê operasyona "Projeya Azadiyê" dest pê bike.
Armanca operasyonê rizgarkirin û rênîşandana wan keştiyên bazirganiyê ye ku li Tengava Hurmizê asê mane.
Trump her wiha hişyarî da ku her destwerdana di vê pêvajoyê de dê bi tundî were bersivandin.