Hewlêr (Rûdaw) - Wezîrê Dadê yê Tirkiyeyê Akin Gurlek ragihand ku destûra niha ya welêt li hemberî guherînên cîhanê, gefên li ser ewlehiya neteweyî û daxwazên gel ên ji bo maf û azadiyan lawaz maye.
Gurlek got, "Nivîsandina destûreke nû pêdiviyeke mecbûrî ye."
Wezîrê Dadê yê Tirkiyeyê Akin Gurlek, doh beşdarî merasîma vekirina "Dibistana Siyasetê" ya li Zanîngeha Stenbolê bû û gotarek pêşkêş kir.
Gurlek di gotara xwe de bal kişand ser pêwîstiya guherîneke bingehîn a di destûra Tirkiyeyê de.
"Peymaneke yasayî û exlaqî ye"
Wezîrê Dadê destnîşan kir ku destûr ne tenê çarçoveyek e ji bo birêvebirina dewletê, her wiha "peymaneke yasayî û exlaqî ya di navbera gel û dewletê de ye."
Gurlek got, "Di wê xala ku em îro gihîştinê de, mixabin destûra me ya niha êdî bersivê nade daxwazan û nikare li gorî pêkhateya bipêşketî ya civakê bimeşe."
2 armancên sereke
Akin Gurlek 2 armancên sereke yên wezareta xwe ji bo paşerojê eşkere kirin.
Ya yekem avakirina Tirkiyeyeke aram û "ji terorê paqijkirî" ye.