Hewlêr (Rûdaw) - Onseke zîv îro bi qasî 3,31 dolarî (ji sedî 4,50) zêde bû û bi 76,26 dolaran hat firotin.
Li gorî vê yekê, niha kîloyeke zîv li bazarên cîhanî bi 2 hezar û 452 dolarî ye.
Di girêbestên paşerojê de jî bihayê onseke zîv 4,40 dolarî zêde bû û gihişt 76,41 dolarî.
Asta herî bilind a 3 hefteyan
Ev asta herî bilind a bihayê zîvê ye ku di 3 hefteyên dawiyê de hatiye tomarkirin.
Ev bihabûn piştî wê yekê hat ku Amerîka û Îranê du hefteyan agirbest ragihand.
Serokê Amerîkayê Donald Trump êrişên plankirî yên li ser binesaziya Îranê ji bo du hefteyan rawestand da ku dan û standinên ji bo çareserkirina şer encam bidin.
Agirbest
Trump her wiha ragihand ku pêşniyareke 10 xalî ji Îranê gihîştiye wan.
Wî ev pêşniyar wekî "bingeheke guncav ji bo dan û standinan" pênase kir û diyar kir ku ew maweyê du hefteyan dê rê bide ku peymanek were îmzekirin û bicihkirin.
Ji aliyê din ve, Îranê bi şertê rawestandina hemû êrişan razîbûna xwe li ser vekirina Tengava Hurmizê ji bo du hefteyan nîşan daye.
Îranê ragihandiye ku divê çûn û hatin bi hevahengiya hêzên çekdar ên Îranê be. Li gorî nûçeyan Îsraîlê jî ev agirbesta demkî qebûl kiriye.
Enflasyon û fişara li ser bankan
Zîv piştî destpêkirina şerê Îranê bi rêjeya zêdetirî ji sedî 20î erzan bûbû.
Bihabûna enerjiyê dilgiraniya zêdebûna enflasyonê ava kiribû.
Vê yekê jî guvaş li ser bankên navendî çêdikir ku rêjeya faîzê zêde bikin an jî kêm nekin.
