Hewlêr (Rûdaw) - Serok Mesûd Barzanî Cejna Qurbanê ya Misilmanên Kurdistan, Îraq û cîhanê pîroz kir.
Serok Mesûd Barzanî ji bo Cejna Qurbaniyê peyamek belav kir.
Serok Barzanî bangî aliyên siyasî yên Herêma Kurdistanê kir ku piştî cejnê bicivin û dawî li vê rewşa asêbûyî bînin.
"Berjewendiyên gel bidin pêş"
Serok Barzanî diyar kir ku ev demên niha "hestiyar û çarenivîssaz in."
Wî daxwaz ji hemû aliyan kir ku li berjewendiyên xelkê Kurdistanê bifikirin.
Serok Barzanî destnîşan kir ku divê berjewendiyên bilind ên gel li ser armanc û berjewendiyên teng re werin girtin.
Serok Barzanî di berdewamiya peyama xwe de xwest ku alî dev ji nakokiyên xwe berdin û got:
"Dev ji wî şerê bêencam û wê xwekujiyê berdin ku demeke proseya siyasî ya Herêma Kurdistanê bi destê wê dinalîne."
Banga civînê ya piştî cejnê
Serok Barzanî daxwaz kir ku piştî Cejna Qurbaniyê aliyên siyasî yên Herêma Kurdistanê bicivin.
Wî bangî wan kir ku bi dilsozî û bi hestên niştimanperweriyê li hev rûnin.
Serok Barzanî xwest ku ew vê asêbûna siyasî çareser bikin û dawî li vê rewşa siyasî ya nexweş bînin.
Serok Barzanî di dawiya peyama xwe de hêvî kir ku ev cejn bibe destpêkek ji bo başbûna rewşa Herêma Kurdistanê.
Wî xwest ku pirsgirêkên siyasî derbas bibin û aştî, aramî û seqamgirî li herêmê û li seranserê cîhanê pêk bên.