Hewlêr (Rûdaw) - Lijneya Wezaran a Kar û Barên Aboriyê ya Îraqê çend biryarên nû dan.
Yek ji wan yekkirina siyaseta gumrikê ya li hemû deriyên sînorî ye.
Her wiha bi awayekî demkî destûr hat dayîn ku zêr di Deriyê Sînorî yê Tirêbîlê re were hawirdekirin.
Lijneya Wezaran a Kar û Barên Aboriyê ya Îraqê îro civiya.
Civîn bi serokatiya Alîkarê Serokwezîr û Wezîrê Karên Derve yê Îraqê Fuad Husên hat lidarxistin.
Di civînê de hejmarek wezîr û berpirsên bilind amade bûn.
Her wiha şandeyeke Hikûmeta Herêma Kurdistanê jî beşdarî civînê bû.
Şande ji berpirsên hikûmetê û serokên jûrên bazirganiyê yên parêzgehan pêk dihat.
Siyaseta gumrikê dibe yek
Li gorî daxuyaniya Lijneya Wezaran a Kar û Barên Aboriyê ya Îraqê, di civînê de behsa rêyên yekkirina rêkarên gumrikê yên li hemû deriyên sînorî hatiye kirin.
Fuad Husên bal kişand ser girîngiya hevahengiya di navbera Hikumeta Federal a Îraqê û Hikûmeta Herêma Kurdistanê de.
Wî diyar kir ku ev hevahengî bi taybetî di bin siya wan aloziyên ewlehî û aborî de girîng e ku herêm di nav re derbas dibe.
Ji aliyê xwe ve, şandeya Herêma Kurdistanê piştgiriya xwe ji bo hewldanên hikûmetê nîşan da.