Hewlêr (Rûdaw) - Lijneya Birêvebiriya Navendî (MYK) ya DEM Partiyê bi serokatiya Hevserokên Giştî Tulay Hatîmogullari û Tuncer Bakirhan civiya.
Di civînê de dê rûdanên herî dawî yên pêvajoya çareseriyê û nexşerêya 15 rojên li pêş bên gotûbêjkirin.
Navenda Giştî ya DEM Partiyê îro mazûvaniya civîneke krîtîk a birêvebiriya partiyê dike.
Civîna Lijneya Birêvebiriya Navendî ya DEM Partiyê saet 10:30an dest pê kir.
Ev civîn dê li ser rûdanên dawî yên siyasî û yên herêmê be.
Pêvajoya çareseriyê rojeva sereke ye
Xala herî girîng a rojeva civînê pêvajoya çareseriyê ye.
Hat ragihandin ku Lijneya Birêvebiriya Navendî dê hûrgiliyên dan û standinên bi dewletê re binirxîne.
Her wiha dê peyamên dawî yên Abdullah Ocalan û gavên yasayî yên li Parlamentoya Tirkiyeyê jî werin nirxandin.
Ji xeynî pêvajoyê, Komîsyona Kedê ya DEM Partiyê dê li ser xebat û çalakiyên 1ê Gulanê raporekê pêşkêşî meclisê bike.
Di vê beşê de dê helwesta li hemberî desteserkirin û girtinên li Stenbolê û parastina mafên karkeran werin gotûbêjkirin.
Dê nexşerêyek were amadekirin
Li gorî zanyariyan, dê di dawiya civînê de ji bo 15 rojên li pêş planeke nû ya xebatê were amadekirin.
