رووداو دیجیتاڵ
یانەی بارسێلۆنا لەگەڵ ئەلێکساندەر سۆرلۆس، هێرشبەری یانەی ئاتلێتیکۆ مەدرید دەستی بە گفتوگۆکردن کردووە و دەیەوێت بیباتە ریزەکانی.
دوێنێ هەینی، هەواڵێکی سەیر و جیاواز میدیای جیهانی تەنی، چەند سەرچاوەیەکی ئیسپانی رایانگەیاند، یانەی بارسێلۆنا بەفەرمی پرسیاری سەبارەت بەگواستنەوەی ئەلیکساندەر سۆرلۆس، هێرشبەرە باڵابەرزەکەی ئاتلێتیکۆ مەدرید کردووە، ئەم یاریزانە نەرویجییە تەمەن 30 ساڵە، کە ئەم وەرزە لە 28 یاریدا 12 گۆڵی تۆمارکردووە و هەردەم وەک یاریزانێکی مەترسیدار دەرکەوتووە بەرامبەر بارسێلۆنا، ئێستا بووەتە ئامانجێکی سەرەکی یانەکە و بارسێلۆنا دەیەوێت بیکاتە شوێنگرەوەی لیڤاندۆڤسکی، کە ئەویش ناڕوونییەکی زۆر لەسەر داهاتووی دەرکەوتووە.
لیڤاندۆڤسکی، ئەستێرە تەمەن 37 ساڵەکەی بارسێلۆنا، نزیکە لەوەی یانەکە جێبهێڵێت، بەپێی میدیای کەتەلۆنا، ئەو یاریزانە دەستەوارەی نوێکردنەوەی گرێبەستەکەی لەگەڵ یانەکە بەدڵ نەبووە و باس لەوە دەکرێت کە سەرقاڵی هەڵسەنگاندنی دەستەوارەی گەورەیە لە دەرەوەی ئەورووپا، لەوانەش یانەکانی خولی سعودیە و خولی ئەمریکی.
سەرچاوە کەتەلۆنییەکان ئاشکرایان کردووە، ئەستێرە پۆڵەندییەکە دەبێت لەنێوان ئەو گرێبەستە گرانبەهایانەی دەرەوەی ئەورووپا و گرێبەستەکەی بارسێلۆنا یەکێکیان هەڵبژێرێت، کە ئەمەی دووەمیان کەمکردنەوەی مووچەکەی لەسەرە، بۆ ئەوەی لەگەڵ یاساکانی یاریی خاوێنی دارایی یانەکە بگونجێت، سەرچاوەیەکی نزیک لە یانەی بارسێلۆنا رایگەیاند "رۆبێرت ناوازە بووە، بەڵام کارگێڕیی یانەکە خۆی بۆ هەموو سیناریۆیەکی جیاواز ئامادە دەکات".
هەوڵەکانی بارسێلۆنا بۆ سۆرلۆس ئاماژەیە بۆ هەنگاوە پێشوەختەکانی یانەکە بۆ بەهێزکردنی هێڵی هێرشبەری، سۆرلۆس باڵای 195 سانتیمەترە و توانای جەستەیی بەرزە، دەتوانێت تەواوکەرێکی باش بێت بۆ لامین یامال و رافینیا لە سیستەمە بەهێزەکەی هانزی فلیک، بەڵام ئاتلێتیکۆ بایەخێکی زۆر بەو هێرشبەرە دەدات، بەتایبەت دوای ئەوەی بەباشی لەگەڵ پێکهاتەکەی دیێگۆ سیمۆنی خۆی گونجاندووە.
بابەتی پەیوەندیدار
وەرزش 29/04/2026
ئێنریکێ: هاوشێوەی یاریزانەکان ماندوو بووم
وەرزش 29/04/2026
شەوە شێتانەکەی چامپیۆنزلیگ؛ پاریس بردیەوە، بەڵام بایرن هیوای لەدەست نەداوە
لە کاتێکدا بارسێلۆنا چاوی لە سۆرلۆسە، ئاتلێتیکۆ مەدرید سەرنجی خستووەتە سەر ناوخۆی یانەکە و لە پێشینەی کارەکانیاندا درێژکردنەوەی گرێبەستی جولیان ئەلڤارێزە، ئەو یاریزانە ئەرجەنتینییە تەمەن 26 ساڵە، هاوینی رابردوو بە بڕی 75 ملیۆن یۆرۆ لە مانچێستەر سیتییەوە گوازرایەوە بۆ یانەکە، کە بەتۆمارکردنی 15 گۆڵ و 8 ئەسیست لە هەموو پاڵەوانێتییەکاندا. ئاستێکی نایابی پێشکەش کردووە و راپۆرتەکان ئاماژە بەوە دەدەن، ئاتلێتیکۆ ئامادەیە "زیادکردنێکی بەرچاو لە مووچەکەیدا" بکات و ئەگەری هەیە مووچە ساڵانەکەی کە ئێستا 10 ملیۆن یۆرۆیە بۆ دوو هێندە زیاد بکات، ئەمەش بۆ دوورخستنەوەی بارسێلۆنا و ئەو یانانەی خولی ئینگلیزییە کە دەیانەوێت بیبەنە ریزەکانیان.
سیمیۆنی هەفتەی رابردوو دوای بردنەوەیان لە بارسێلۆنا گوتی "ئەلڤارێز ئێستا و داهاتووی ئێمەیە، ئێمە تیپەکەمان لە دەوروبەری ئەو یاریزانانە بونیاد دەنێین کە گوزارشت لە گیانی جەنگاوەریی ئێمە دەکەن"، ئەم هەنگاوەی ئەتلێتیکۆ ستراتیژی یانەکە پیشان دەدات بۆ پاراستنی ئەستێرەکانی لە بازاڕی گواستنەوەی یاریزانانی ئەورووپادا.
ئارەزووی بارسێلۆنا بۆ گواستنەوەی سۆرلۆس دەبێتە هۆی زنجیرەیەک گۆڕانکاری، ئەگەر لیڤاندۆڤسکی بڕوات، ئەو پارەیەی لە مووچەکەی دەگەڕێتەوە دەبێتە پاڵنەرێک بۆ گواستنەوەی یاریزان لە هاوینی داهاتوودا، هاندەران چاوەڕێی روونکردنەوەی زیاتر دەبن کاتێک دەنگۆکانی بازاڕی گواستنەوە گەرمتر دەبن.