رووداو دیجیتاڵ
وەزیری بەرگری ئیسرائیل، هێرش دەکاتە سەر لامین یامالی ئەستێرەی ئیسپانی و هۆشداری دەداتە یانەی بارسێلۆنا، بەهۆی ئەوەی یاریزانەکە ئاڵای فەڵەستینی بەرزکردووەتەوە.
یسرائیل کاتس، وەزیری بەرگری ئیسرائیل، هێرشێکی تووندی کردە سەر لامین یامال، ئەستێرەی یانەی بارسێلۆنا، دوای ئەوەی ناوبراو لە کاتی ئاهەنگەکانی یانەکەی بەبۆنەی بەدەستهێنانی نازناوی خولی ئیسپانیا، ئاڵای فەڵەستینی بەرزکردەوە.
رەفتارەکەی لامین یامال لە چەند کاژێری رابردوودا کاردانەوەی بەرفراوانی لێکەوتەوە، دوای ئەوەی ئەستێرەکەی هەڵبژاردەی ئیسپانیا لە کاتی ئاهەنگی یانەکەی لە ناو پاسە کراوەکەدا، بە ئاڵای فەڵەستینەوە دەرکەوت.
وەزیری بەرگری ئیسرائیل لە پۆستێکدا، کە لە هەژماری تایبەتی خۆی لە تۆڕی کۆمەڵایەتی "X" بڵاویکردووەتەوە، رایگەیاند، لامین یامال هاندانی دوژمنایەتی و رق و کینەی دژی ئیسرائیلی هەڵبژاردووە.
ئەو زیاتر گوتی "سەربازەکانمان شەڕی دژی رێکخراوی تیرۆریستی حەماس دەکەن، کە لە 7ـی ئۆکتۆبەردا منداڵ، ژن و پیر و پەککەوتەی کوشتووە، دەستدرێژی کردووەتە سەریان، سووتاندوونی و تیرۆری کردوون".