ناسڕ خلێفی، سەرۆکی یانەی پاریس سانجێرمانی فەرەنسی، پلانێکی گەورەی داناوە بۆ ئەوەی گورزێکی کوشندەتر لەوەی لە هاوینی 2017 لە بارسێلۆنای دا، کاتێک نەیماری برد، لەو یانەیە بداتەوە و ئەمجارە ئەستێرەی یەکەمی ئەو یانەیە بەهەر نرخێک بێت بباتە ریزەکانی.
دوای دوورکەوتنەوەی بارسا لە کێبڕکێیەکانی خولی یانە پاڵەوانەکانی ئەورووپا، چەند جووڵەیەکی رانەگەیێندراو لەلایەن پاریس سانجێرمانەوە بۆ راوکردنی ئەستێرەی لاوی بلاوگرانا، لامین یامال دەستیان پێکردووە، لە هەنگاوێکدا کە وەک یەکێک لە هەستیارترین کەیسەکانی بازاڕی تۆپی پێی ئەورووپا وەسف دەکرێت.
بەگوێرەی راپۆرتە رۆژنامەڤانییەکان، یانە فەرەنسییەکە ماوەیەکی زۆرە کار لەسەر پلانێکی درێژخایەن دەکات کە ئامانجی چاودێریکردنی دۆخی یاریزانەکەیە لە ناو بارسێلۆنادا، لەگەڵ ئامادەباشی بۆ دەستوەردان لە هەر ساتێکدا کە هەلێک بۆ کردنەوەی دەرگای دانوستاندن بڕەخسێت، چ لەگەڵ یانەکە بێت یان لەگەڵ کەسە نزیکەکانی یاریزانەکە.
سەرچاوەکان ئاماژە بەوە دەکەن کە کارگێڕیی پاریس سانجێرمان بەپاڵپشتی تۆڕێکی فراوان لە بەرێوەبەرانی کاری کاریگەر لە بازاڕی گواستنەوە، بەباشی ئاگاداری قورسیی دانوستاندنەکانی ئێستان، بەڵام پشت بە ستراتیژی 'چاوەڕوانیی درێژخایەن' دەبەستن، بەو ئومێدەی لە داهاتوودا بارودۆخەکە بە قازانجی ئەوان بگۆڕێت.
لە بەرامبەردا، یانە فەرەنسییەکە خۆی ئامادە دەکات بۆ پێشکەشکردنی دەستەوارەیەکی دارایی گەورە کە لەوانەیە هەموو پێشبینییەکان تێپەڕێنێت، ئەوەش لە ئەگەری دەرکەوتنی هەر ئاماژەیەک بۆ ئەگەری رۆیشتنی یاریزانەکە، یان تەنانەت تاقیکردنەوەی بیرۆکەی گواستنەوەی، لە هەنگاوێکدا کە ئامانجی تاقیکردنەوەی راستەوخۆی هەڵوێستی بارسێلۆنایە.
کارگێڕیی پاریس سانجێرمان پێیوایە لامین یامال بەردی بناخەی هەر پڕۆژەیەکی داهاتووە، ئەمەش بەهۆی بەهرە دەگمەنەکەی و توانای دروستکردنی جیاوازی لە تەمەنێکی بچووکدا، ئەوەش وایکردووە ببێتە ئامانجێکی ستراتیژی و نەک تەنیا گرێبەستێکی ئاسایی.
یانە فەرەنسییەکە لە پلانەکەیدا پشت بە دوو فاکتەری سەرەکی دەبەستێت: یەکەمیان بەردەوامبوون لە گوشاری ناڕاستەوخۆ لەڕێگەی چاودێریکردن و راپۆرتەکانەوە، دووەمیشیان چاوەڕوانکردنی هەر هەژانێکی ئەگەری لە ئەنجامەکانی بارسێلۆنا کە لەوانەیە یاریزانەکە یان کەسە نزیکەکانی ناچاربکات بیر لە بژاردەکانی دیکە بکەنەوە.
لە لایەکی دیکەوە بارسێلۆنا لەسەر هەڵوێستێکی روون بەردەوامە و لامین یامال بە بەشێکی دانەبڕاو لە پڕۆژەی ئێستا و داهاتووی تیپەکە دەزانێت، وەک یەکێک لە دیارترین بەهرەمەندەکانی نەوەی نوێ لە تۆپی پێی ئەورووپادا.
سەرەڕای ئەوەش، لە جیهانی نوێی تۆپی پێدا هاوکێشەکان بەکراوەیی دەمێننەوە، چونکە تەنانەت گەورەترین بەهرەمەندەکانیش لە بەرامبەر پارە و دەستەوارە خەیاڵییەکاندا بێ پارێزبەندی نین، ئەمەش وایکردووە ئەم کەیسە ببێتە یەکێک لەو بابەتانەی زۆرترین چاودێری دەکرێن لە بازاڕی گواستنەوەی داهاتوودا.
