دوای ئەوەی ریال مەدرید بەرامبەر ریال بێتیس دوو خاڵی دیکەی لەدەستدا، فلۆرێنتینۆ پێرێزی سەرۆکی یانەکە بڕیاریدا گرێبەست لەگەڵ راهێنەرێکی تووند و خاوەن کەسایەتی بەهێز بکات بۆ گەڕاندنەوەی دیسپلین بۆ ژووری جلگۆڕین!.
ریال مەدرید گورزێکی بەهێزی بەرکەوت لە ململانێی خولی ئیسپانیا دوای یەکسانبوونەکەی بەرامبەر ریال بێتیس بەئەنجامی 1-1؛ ئەم ئەنجامە لەوانەیە یەکلاکەرەوە بێت لە دیاریکردنی چارەنووسی نازناوەکە لە گەڕەکانی داهاتوودا.
ئەم پاشەکشەیە هەلێکی زێڕینی بەخشییە بارسێلۆنا بۆ ئەوەی لە پێشەنگ دووربکەوێتەوە، لەکاتێکدا تیپە کەتەلۆنییەکە خۆی بۆ رووبەڕووبوونەوەی خیتافی ئامادە دەکات؛ لە ئەگەری بردنەوەیاندا، جیاوازییەکە بۆ 11 خاڵی تەواو زیاد دەکات، ئەمەش زۆر نزیکیان دەکاتەوە لە یەکلاکردنەوەی نازناوەکە بەشێوەیەکی پێشوەختە.
بارسێلۆنا بەورەیەکی بەرز و ئارەزوویەکی روونەوە دەچێتە نێو ئەو ەووبەڕووبوونەوەیە بۆ ئەوەی سوود لە پاشەکشەی رکابەرە راستەوخۆکەی وەربگرێت، بەتایبەتی لەگەڵ نزیکبوونەوەی کۆتایی وەرز، کە تێیدا هەر خاڵێک بە هەنگاوێک بەرەو تاجی پادشایەتی و بەدەستهێنانی نازناوەکە دادەنرێت.
لە بەرامبەردا، گوشارەکان لەنێو ریال مەدرید روو لە زیادبوونن، نەک تەنیا بەهۆی ئەنجامەکانەوە، بەڵکو بەهۆی ئەو ناسەقامگیرییەی لەم دواییانەدا دەوری تیپەکەیان داوە، کە بەڕوونی رەنگدانەوەی لەسەر ئاستی ناو یاریگە هەبووە.
بەگوێرەی ئەوەی ماڵپەڕی دیفێنسا سێنتراڵ بڵاویکردووەتەوە، فلۆرێنتینۆ پێرێزی سەرۆکی یانەکە بەجددی تاوتوێی ئەگەری گرێبەستکردن لەگەڵ جۆزێ مۆرینیۆی راهێنەری پۆرتوگالی دەکات، بەئامانجی گەڕاندنەوەی دیسپلین و کۆنترۆڵکردنی ژووری جلگۆڕین، کە راپۆرتە رۆژنامەڤانییەکان ئاماژە بەوە دەکەن بەدەست پشێوییەوە دەناڵێنێت.
مۆرینیۆ یەکێکە لەو ناوانەی ئەزموونێکی زۆری لە مامەڵەکردن لەگەڵ گوشارەکان و بەڕێوەبردنی ئەستێرەکاندا هەیە، ئەمەش دەیکاتە بژاردەیەکی نموونەیی بۆ گەڕاندنەوەی هاوسەنگی لەنێو تیپەکەدا، ئەگەر بڕیاری گۆڕانکاری لە ستافی هونەریدا بدرێت.
لەگەڵ نزیکبوونەوەی یەکلاکردنەوەی لالیگا، وێنەکە روونتر دەردەکەوێت؛ بارسێلۆنا لە نازناوەکە نزیک دەبێتەوە و ریال مەدریدیش بەدوای چارەسەری خێرادا دەگەڕێت بۆ رزگارکردنی وەرزەکەی و رێکخستنەوەی نێوماڵەکەی پێش ئەوەی کات لەدەستبچێت.
