Hewlêr (Rûdaw) - Li Srî Lankayê êrişî keştiya şer a Îranê kiirn û 101 kes winda ne.
Li gorî nûçeya rojnameya Daily Mirrorê ya herêmî, keştiya "IRIS Dena"yê ya hêzên deryayî yên Îranê li peravên bajarê Galleyê yê Srî Lankayê banga alîkariya lezgîn kiriye.
Rayedarên Srî Lankayê diyar kir ku bûyer li derveyî avên wan ên herêmî qewimiye û ji bo veguhastina xebatkarên keştiyê operasyoneke mezin hatiye destpêkirin.
Keştiya şer a Îranê ya pola "Moudge"yê ku 180 xebatkar tê de bûn, bi qasî 2 hezar û 750 kîlometreyan dûrî Îranê hat lêxistin.
Hat ragihandin ku piştî êrişê, keştiyê banga hawarê kiriye.
Wezîrê Karên Derve yê Srî Lankayê Vijitha Herath eşkere kir ku keştiya şer a Îranê li derveyî avên wan hatiye lêxistin.
Herath da zanîn ku 32 deryavanên ku bi giranî birîndar bûne, veguhastine nexweşxaneya bajarê Galleyê.
Li xebatkarên winda digerin
Wezareta Parastinê ya Srî Lankayê ragihand ku ji bo dîtina xebatkarên din ên keştiya ku 40 kîlometreyan li başûrê giravê hatibû lêxistin, xebatên lêgerînê berdewam dikin.
Rayedarekî ji AFPê re got, "Em lêgerînê didomînin lê em hîn nizanin çi hatiye serê tîma din a keştiyê."