Hewlêr (Rûdaw) - Wezîrê Parastinê yê Îsraîlê Israel Katz, li ser birêvebiriya Îranê daxuyaniyên tund dan.
Katz diyar kir ku ew dê kesê ku were şûna Elî Xamineyî bikin armanc.
Rêberê Olî yê Îranê Elî Xamineyî di êrişên Amerîka û Îsraîlê de hatibû kuştin.
Wezîrê Parastinê yê Îsraîlê Israel Katz li ser hesabê xwe yê medyaya civakî peyamek belav kir û birêvebiriya Îranê kir armanc.
Israel Katz got ku dê serokê nû yê Îranê jî ji aliyê Îsraîlê ve were armancgirtin.
"Navê wî çi dibe bila bibe dê bibe armanc"
Katz di daxuyaniya xwe de ev gotin bi kar anîn:
“Rejîma terorîst a li Îranê plan dike ku Îsraîlê tune bike û gefan li Amerîka û cîhana azad bixwe.
Kîjan serok ji bo domandina vê planê were wezîfedarkirin, dê teqez bibe armancek û ji holê were rakirin.
Navê wî çi ye yan jî li kû derê xwe vedişêre ne girîng e.”
Amadekariyên leşkerî û hevkariya bi Amerîkayê re
Katz her wiha bal kişand ser amadekariyên leşkerî yên ku Îsraîl wan bi rê ve dibe.
Katz da zanîn ku wan bi Serokwezîr Benjamin Netanyahu re ferman daye Hêzên Parastina Îsraîlê.
Wî diyar kir ku ev wezîfe beşek ji armancên operasyona "Nirîna Harrierê" ye.
Wezîrê Parastinê yê Îsraîlê anî zimên ku ew bi Amerîkayê re tevdigerin û armanca wan ew e ku şiyana leşkerî ya birêvebiriya niha ya Îranê qels bikin.
Katz di daxuyaniya xwe de destnîşan kir ku ji bo guherîna birêvebiriya Îranê pêwîstî bi mercên guncaw heye û xebatên wan ên ji bo pêkanîna van mercan didomin.
