Hewlêr (Rûdaw) - Serokwezîrê Îsraîlê Benjamîn Netanyahu îdia kir ku wan Sekreterê Encûmena Bilind a Asayîşa Neteweyî ya Îranê Elî Larîcanî kuştiye.
Netanyahu got, “Me îro serê sibehê Larîcanî ji holê rakir.”
Êrişên asmanî li Îranê
Serokwezîrê Îsraîlê Benjamîn Netanyahu derbarê êrişên dawî yên li Îranê daxuyanî da.
Netanyahu da zanîn ku wan bi balafirên şer û dronan li Îranê çalakî pêk anîne.
Netanyahu got, “Me îro serê sibehê Elî Larîcanî ji holê rakir.
Elî Larîcanî patronê Supaya Pasdaran bû ku bi awayekî fîîlî Îran bi rê ve dibir.”
Fermandarê Besîcê jî hat kuştin
Netanyahu destnîşan kir ku wan Fermandarê Besîcê Xulamriza Silêmanî jî kuştiye.
Netanyahu li ser wî jî got, “Ew alîkarê wan kesan bû ku li kolanên Tehranê û bajarên din ên Îranê tirs û xof di nav xelkê de belav dikir.
Me ew jî bi Larîcanî re ji holê rakir.”
Hêviya lawazkirina rejîmê
Netanyahu da xuyakirin ku ew hewl didin rejîma Îranê lawaz bikin.
Wî bal kişand ser wê yekê ku ew dixwazin derfetekê bidin xelkê Îranê da ku qedera xwe bi xwe diyar bikin.
Serokwezîrê Îsraîlê destnîşan kir ku ev pêvajo dê ji nişka ve û asan nebe.
Hevkarî û hevahengiya bi Amerîkayê re
Netanyahu behsa hevahengiya serbazî ya bi Amerîkayê re jî kir û got:
“Di heman demê de em alîkariya dostên xwe yên Amerîkî yên li Kendavê dikin.”
Wî ragihand ku wî doh ev mijar bi Serok Trump re bi berfirehî axiviye.
Suprîzên din hene
Netanyahu diyar kir ku di navbera wî û Trump û tîma wî de hevkariyeke baş heye û got:
“Bi êrişên nerasterast û rasterast ên ku zextên mezin li ser rejîma Îranê çêdikin, em dê alîkariya wan bikin.”
Netanyahu li ser plansaziyên paşerojê jî got, “Gelek sûprîzên din hene.
Tu dê şer bi stratejiyê bikî. Em dê hemû stratejiyan li vir eşkere nekin lê wekî min ji we re got, gelek ji wan hene.”
