Hewlêr (Rûdaw) - Hikûmeta Îranê ragihand ku wan careke din Tengava Hurmizê ji çûn û hatina keştiyan re girtiye.
Ajansa nûçeyan a Farsê ya Îranê ragihand, ji ber ku cezayên Amerîkayê didomin, Tehranê biryar daye careke din Tengava Hurmizê bigire.
Berpirsekî leşkerî yê Îranê ji ajansê re axivî û Washington bi "çetetiya deryayê" tohmetbar kir.
Wî berpirsî got, "Heta ku Amerîka li ser azadiya temam a çûn û hatina keştiyan li hev neke, rewşa Tengava Hurmizê dê wekî berê di bin kontroleke tund de bimîne."
Gule li keştiyan reşdandin
Li aliyê din, Fermandariya Navendî ya Hêzên Amerîkayê (CENTCOM) ragihand ku ji destpêka vê hefteyê ve 23 keştî pêbendî rênimayan bûne û vegeriyane.
Di heman demê de, berpirsekî parastinê yê Amerîkayê û Ajansa Çavdêriya Bazirganiya Deryayî ya Brîtanyayê (UKMTO) eşkere kir ku hêzên Îranê gule li gelek keştiyên petrolê reşandine.
Berpirsekî Amerîkî ji malpera Axiosê re ragihandiye ku şemiyê herî kêm 3 êriş li ser keştiyên bazirganiyê hatine kirin.
Li gorî amarên Ajansa "Tanker Trackers"ê, du ji wan keştiyên ku gule li wan hatine reşandin yên Hindî bûne.