رووداو دیجیتاڵ
دوای ئەوەی دۆناڵد ترەمپ، سەرۆکی ئەمریکا ئاماژەی بەوە کرد، ئەگەری رێککەوتنێک هەیە لەگەڵ ئیران بۆ کۆتایی پێهێنانی شەڕ و درێژکردنەوەی ئاگربەست، نرخی نەوت بۆ دووەم رۆژی یەک لەدوای یەک رووی لە دابەزین کرد.
ئەمڕۆ چوارشەممە، نرخی نەوتی برێنتی دەریای باکوور بۆ رادەستکردنی لە مانگی حەوتدا 1 دۆلار و 52 سەنت دابەزی و بە 108 دۆلار و 35 سەنت مامەڵەی پێوەکرا.
نرخی نەوتی سووکی تەکساسی ئەمریکاش بۆ رادەستکردنی لە مانگی شەشدا 1 دۆلار و 50 سەنت دابەزی و بەرمیلێکی بە 100 دۆلار و 77 سەنت مامەڵەی پێوەکرا.
بابەتی پەیوەندیدار
سەرۆکی ئەمریکا رۆژی سێشەممە ئاماژەی بەوە کرد، ئەگەری رێککەوتنێکی گشتگیر لەگەڵ ئێران هەیە. ئەوەش بووەتە هۆکار بۆ ئەوەی ئەمڕۆ بازرگانان بە گەشبینییەوە بڕواننە کرانەوەی تەنگەی هورمز و ئەگەری خستنەڕووی نەوتی زیاتر لە بازاڕەکاندا.
بەپێی پەیمانگەی نەوتی ئەمریکا، قەبارەی نەوت و سووتەمەنیی کۆگاکراو لەو وڵاتەدا بۆ ماوەی سێ هەفتەی یەک لە دوای یەکە رووی لە دابەزین کردووە.
پەیمانگەکە دەڵێت، هەفتەی رابردوو، کۆگەی نەوتی خاو بەبڕی 8.1 ملیۆن بەرمیل و کۆگەی بەنزین بەبڕی 6.1 ملیۆن بەرمیل کەمیکردووە.