رووداو دیجیتاڵ
هێزی دەریایی سوپای پاسدارانی ئێران رایدەگەیێنێت، هەر هەوڵێکی کەشتییە سەربازییەکان بۆ نزیکبوونەوە لە تەنگەی هورمز وەک پێشێلکردنی ئاگربەست دەبینن و بە تووندی و بە شێوەیەکی سەخت رووبەڕوویان دەبنەوە.
لە راگەیێندراوی ژمارە 59ـی پەیوەندییە گشتییەکانی سوپای پاسدارانی ئێراندا، کە ئەمڕۆ یەکشەممە بڵاوکراوەتەوە، هاتووە: "بەپێچەوانەی بانگەشە درۆینەکانی هەندێک لە بەرپرسانی دووژمن، تەنگەی هورمز لە جڵەو و بەڕێوەبردنی ژیرانەدایە و بە رەچاوکردنی رێسا تایبەتەکان، تەنیا بۆ تێپەڕبوونی بێ زیانی کەشتییە سڤیلەکان کراوەیە."
سوپای پاسداران هۆشدارییەکی تووند دەداتە هێزە دەریاییەکانی ئەمریکا و هاوپەیمانەکانی و دەڵێت: "بۆ ئەو کەشتییە سەربازییانەی کە لەژێر هەر ناو و بیانوویەکدا، مەبەستی نزیکبوونەوەیان لە تەنگەی هورمز هەبێت، ئەمە بە پێشێلکردنی ئاگربەست دادەنرێت و بە تووندی و بە شێوەیەکی سەخت رووبەڕوویان دەبینەوە.
بابەتی پەیوەندیدار
"
ئەم هۆشدارییە نوێیەی سوپای پاسداران دوای ئەوە دێت کە دۆناڵد ترەمپ، سەرۆکی ئەمریکا رایگەیاند، دانوستاندنەکانی پاکستان بێ ئەنجام بوون و فەرمانی بە هێزی دەریایی وڵاتەکەی کردووە تەنگەی هورمز گەمارۆ بدەن.
لە ماوەی 40 رۆژی جەنگدا، تەنگەی هورمز بووەتە چەقی ململانێکان و ئێران چەندین جار هەڕەشەی داخستنی کردووە.
هەرچەندە ئێستا ناوچەکە لەژێر سایەی ئاگربەستێکی کاتیی 2 هەفتەییدایە، بەڵام ئەم لێدوانانەی سوپای پاسداران و بڕیارەکەی ترەمپ نیشانەی ئەوەن کە ئاگربەستەکە لەبەردەم مەترسییەکی گەورەدایە و ئەگەری دەستپێکردنەوەی جەنگ لە ئارادایە.