موجتەبا خامنەیی: ئەرتەشی ئێران زەلیلیی ئەمریکا و ئیسرائیلیان پێشانی جیهان دا

موجتەبا خامنەیی لە پەیامەکەیدا دەڵێ: "ئەرتەش لە بری ئەوەی سەر بە رژێمی تاغووتی و فاسدی پەهلەوی بێت، چووە نێو باوەشی گەرمی گەلەوە و لە بەرامبەر نەخشە شوومەکانی ئەمریکا و جوداخوازان وەستایەوە و داستانی خوڵقاند."

رێبەری باڵای کۆماری ئیسلامیی ئێران ئاماژەی بە جەنگی ئێستای ناوچەکە کرد و رایگەیاند، سوپای وڵاتەکەی شەڕی گەورە دەکات و دەڵێ: "درۆنەکانمان وەک هەورەبرووسکە بەسەر تاوانبارانی ئەمریکی و زایۆنیدا دەبارێن و هێزی دەریاییە دلێرەکەشمان ئامادەیە تاوەکو تاڵی شکستی نوێ بچێژێتە قوڕگی دووژمنان."

لە بەشێکی دیکەی پەیامەکەیدا، موجتەبا خامنەیی ئاماژەی بەوە کردووە کە ئەمڕۆ ساڵیادی لەدایکبوونی "رێبەری مەزنی شەهیدمانە" (ئایەتوڵڵا عەلی خامنەیی) و ستایشی هەوڵەکانی کرد بۆ پاراستنی ئەرتەش لە بەرامبەر هەوڵەکانی هەڵوەشاندنەوەی لە سەرەتای شۆڕشدا. 

موجتەبا خامنەیی باس لەوە دەکات کە هێڵی بەهێزکردنی تواناکانی ئەرتەش بەدواداچوونی بۆ دەکرێ و بەم زووانە رێنمایی نوێ لەو بارەیەوە دەردەچن.

بەناوی خودای بەخشندە و میهرەبان

"إِنَّ اللَّهَ یُحِبُّ الَّذینَ یُقاتِلونَ فی سَبیلِهِ صَفًّا کَأَنَّهُم بُنیانٌ مَرصوصٌ"

بیست و نۆی خاکەلێوە، رۆژی لەدایکبوونی پیرۆزی ئەرتەشی کۆماری ئیسلامیی ئێران کە بە دەستپێشخەرییەکی ژیرانەی خومەینیی گەورە (رەحمەتی خودای لێ بێت) بەم ناوە ناونرا، لە هەموو ئەرتەشییەکان و خێزانە بەڕێزەکانیان و گەلی گەورەی ئێران پیرۆز دەکەم.

سەرکەوتنی شۆڕشی ئیسلامی، هێڵی جیاکەرەوەی نێوان دوو قۆناخی ژیانی ئەرتەش هەژمار دەکرێ و دەبێت بە کۆتایی ئەو سەردەمە لاوازییە بزانرێت کە لە لایەن دووژمنانی ئەم ئاو و خاکە و بە دەستی خائینانی ناوخۆ بەسەر ئەرتەش و ئەرتەشییە قارەمان و ڕاستگۆکانی وڵاتدا سەپێندرابوو. لەو کاتەوە ئەرتەش لە شوێنی راستەقینەی خۆی وەستاوە و لە جیاتی ئەوەی سەر بە رژێمی تاغووتی و فاسدی پەهلەوی بێت، چووە ناو باوەشی گەرمی گەلەوە، کە بە راستی ئەرتەش رۆڵەی گەلە و لە ناو دڵی ماڵەکانی خەڵکەوە هەڵدەقوڵێت. ئەرتەش لە بەرامبەر نەخشە شوومەکانی ئەمریکا و پاشماوەکانی تاغووتی پەهلەوی و جوداخوازانێک کە ئێرانییەکی لێکهەڵوەشاوەیان دەویست وەستایەوە و داستانی خوڵقاند.

ئەرتەشی ئیسلام ئێستا وەک دوو جەنگی سەپێندراوی پێشوو، بە جەربەزەییەوە بەرگری لە ئاو و خاک و ئەو ئاڵایە دەکات کە پێیەوە بەستراوەتەوە. بەو پشتوێنە بەهێزە خودایی و جەماوەرییەی خۆی و لە رێزگەلێکی چڕ و پتەودا، شانبەشانی موجاهیدانی دیکەی هێزە چەکدارەکان لەگەڵ دوو سوپای سەرکردەی بەرەی کوفر و ئیستکبار دەستەویەخە بووە و لاوازی و زەلیلیی ئەوانی لە بەرچاوی جیهانیان نیشانداوە، هەروەک چۆن درۆنەکانی وەک هەورەبرووسکە بەسەر تاوانبارانی ئەمریکی و زایۆنیدا دەبارێن، هێزی دەریاییە دلێرەکەشی ئامادەیە تاوەکو تاڵی شکستی نوێ بچێژێتە قوڕگی دووژمنان.

لە لایەکی دیکەوە، بیست و نۆی خاکەلێوە ساڵیادی لەدایکبوونی تاقانەی سەردەم، رێبەری مەزنی شەهیدمانە؛ ئەو کەسەی کە زۆرترین هەوڵی لە دەیەی یەکەمی شۆڕشەوە دا بۆ پاراستنی ئەرتەش لە بەرامبەر هەوڵی شوومی هەڵوەشاندنەوەی و پاشان بۆ بەرزکردنەوەی تواناکانی لە بوارە جیاوازەکاندا.

بێگومان هێڵی بەرەوپێشچوونی تواناکانی ئەم دامەزراوە رەسەنە گەلییەی کە لە رۆژهەڵاتەوە بۆ رۆژئاوا و لە باکوورەوە بۆ باشووری وڵات دەپارێزێ، دەبێت بە شێوەیەکی دووقات بەدواداچوونی بۆ بکرێت و بە ئیزنی خودا لە ئاسۆیەکی نزیکدا رێنماییە پێویستەکان بۆ جێبەجێکردنی دەردەچن.

لەو رێڕەوەدا، سەرنجدان بە رووخساری ئەو قارەمانانەی لە نەوە جیاوازەکانی بەڕێوەبردن لە پێنج دەیەی رابردوودا رێبەری و سەرکردایەتیی ئەرتەشیان کرد و زۆربەیان چوونە ریزی شەهیدانەوە، هەروەها بەرنامە و کارەکانیان و رەوشتە بەرز و دڵسۆزانەکەیان، دەبێتە وانە و ئیلهامبەخش بۆ هەموو بەشەکانی هێزە چەکدارەکان. لە گەورەپیاوانی وەک قەرەنی، فەلاحی، نامجوو، فەکووری، بابایی، سەتاری، ئەردەستانی و سەبادی شیرازییەوە بگرە تاوەکو دوایین شەهیدە ناودارەکانی وەک سەید عەبدولڕەحیم موسەوی و عەزیز نەسیرزادە.

سڵاو و دروودی خودای مەزن بۆ هەموو موجاهیدانی ئەرتەشی کۆماری ئیسلامیی ئێران، لە فەرماندە و پلەدارەکانیەوە تاوەکو کارمەند و سەربازە بێدەنگ و ونەکانی؛ سڵاو و دروودی خودای مەزن بۆ هەموو ئیسارگەران و بریندارانی جەنگ و سڵاو و رەحمەتی تایبەتی خودا بۆ خێزانە بەڕێزەکانی هەموو شەهیدانی جەنگی سەپێندراوی ئەمریکا و رژێمی زایۆنی دژی گەلی گەورەی ئێران.