رووداو دیجیتاڵ
بەگوێرەی راپۆرتێکی نوێی نێودەوڵەتی، ژمارەی ئەو کەسانەی لە تورکیا و باکووری کوردستان خاوەنی 30 ملیۆن دۆلار و زیاترن، لە ماوەی پێنج ساڵی رابردوودا 93.5% زیادیکردووە. بەمەش تورکیا لەسەر ئاستی جیهان بووەتە سێیەم وڵات کە زۆرترین گەشەی لە ژمارەی دەوڵەمەندەکاندا تۆمار کردبێت.
کۆمپانیای راوێژکاریی (نایت فرانک - Knight Frank) کە بارەگاکەی لە لەندەنە، ئەنجامی راپۆرتی سامانی جیهانیی ساڵی 2026ی بڵاوکردەوە. بەپێی داتاکانی راپۆرتەکە، تورکیا و باکووری کوردستان گەشەکردنێکی چاوەڕواننەکراویان لە ژمارەی ئەو کەسانەدا تۆمارکردووە کە خاوەنی "سامانی زۆر بەهادار"ن، بە جۆرێک خێرایی گەشەکردنەکە دوو هێندەی تێکڕای جیهانی بووە.
ئامارەکان چی دەڵێن؟
بەپێی راپۆرتەکە، ژمارەی ئەو کەسانەی لە تورکیا و باکووری کوردستان سامانی پوختیان لە سەرووی 30 ملیۆن دۆلارەوەیە، بەمشێوەیە گۆڕانکاری بەسەردا هاتووە:
- ساڵی 2021: ژمارەیان 2 هەزار و 174 کەس بووە.
- ساڵی 2026: ژمارەیان گەیشتووەتە 4 هەزار و 208 کەس (زیادبوونی 93.5%).
- بۆ ساڵی 2031: پێشبینی دەکرێت ژمارەکە بگاتە 4 هەزار و 772 کەس.
سەبارەت بە ملیاردێرەکان (ئەوانەی خاوەنی هەزار ملیۆن دۆلار و زیاترن)، راپۆرتەکە ئاماژە بەوە دەکات کە ژمارەیان لە 35 کەسەوە بۆ 46 کەس لە ساڵی 2031دا بەرز دەبێتەوە، واتە بە رێژەی 31% زیاد دەکەن.
بابەتی پەیوەندیدار
تورکیا لە پلەی سێیەمی جیهاندایە
توێژینەوەکە دەریخستووە کە تورکیا لە پێشەنگی ئەو وڵاتانەیە کە گەورە دەوڵەمەندەکانیان بە خێرایی زیاد دەکەن. لیستی ئەو وڵاتانەی زۆرترین گەشەیان لە 5 ساڵدا تۆمارکردووە بەمشێوەیەیە:
1. پۆڵەندا: 109%
2. قەتەر: 107%
3. تورکیا و باکووری کوردستان: 93.5%
4. رۆمانیا: 93%
دۆخی سامانی جیهانی
لە سەرانسەری جیهاندا، ژمارەی گەورە دەوڵەمەندەکان لە ماوەی 5 ساڵدا لە 551 هەزار کەسەوە بۆ زیاتر لە 713 هەزار کەس بەرزبووەتەوە (گەشەی 29%).
راپۆرتەکە ئاماژە بەوە دەکات کە 40%ی ئەم زیادبوونە جیهانییە لە ویلایەتە یەکگرتووەکانی ئەمریکا بووە. چین وەک دووەم هێزی گەورە ماوەتەوە و هیندستانیش وەک ناوەندێکی نوێی بەرهەمهێنانی سامان لە ناوچەی ئاسیا-پاسفیک دەرکەوتووە.
نایت فرانک دەڵێت، هەرچەندە سامان لە رووبەرێکی جوگرافیی فراوانتردا دابەشبووە، بەڵام هێشتا ناوەندە داراییە گەورەکان پشکی شێریان بەردەکەوێت. تورکیاش وەک یەکێک لە ئابوورییە پەرەسەندووەکان، سەرنجی توێژەرانی راپۆرتەکەی راکێشاوە کە چۆن پشکی بەرچاوی لە گەشەی سامان و موڵکی جیهانیدا بەدەستهێناوە.