رووداو دیجیتاڵ
دانوستاندنی نێوان ئێران و ئەمریکا لە ئیسلامئاباد، زیاتر لە 15 کاژێری خایاند و هیچ رێککەوتنێک نەکرا. وەزارەتی دەرەوەی ئێران دەڵێت، باسیان لە کێشەی تەنگەی هورمز و پرسی ئەتۆمیش کردووە.
تەسنیم لە زاری بەرپرسێکی ئێرانییەوە دەڵێت، هێشتا ناکۆکیی قووڵ هەن و بەهۆی داواکارییە سەختەکانی ئەمریکاوە، هیچ رێککەوتنێک نەکرا.
پاکستان بۆ ئەوەی هەردوولا بگەیێنێتە رێککەوتن، پێشنیازی کرد تاران و واشنتن رۆژی یەکشەممە گەڕێکی دیکەی دانوستاندن بکەن، سەرەتا هەردوولا رازی بوون، بەڵام دوای چەند کاژێرێک، جێگری ترەمپ رایگەیاند، بەبێ هیچ رێککەوتنێک دەگەڕێنەوە ئەمریکا.
جەی دی ڤانس، جێگری سەرۆکی ئەمریکا رۆژی یەکشەممە رایگەیاند، دانوستاندنەکانیان لەگەڵ ئێران لە ئیسلام ئاباد شکستیان هێناوە لە گەیشتن بە رێککەوتن. گوتیشی، پاکستان جێدەهێڵێت، بەڵام "باشترین و کۆتا پێشنیاز"یان خستووەتە بەردەم تاران.
ئاژانسی تەسنیمی ئێرانییش دەڵێت، بەهۆی داواکارییە زێدەڕۆییەکانی ئەمریکاوە، تاران و واشنتن نەگەیشتنە رێککەوتن و هێشتا هیچ بەرنامەیەک بۆ کات، شوێن و گەڕی داهاتووی دانوستاندنەکان دیارینەکراوە.
ئیسماعیل بەقایی، گوتەبێژی وەزارەتی دەرەوەی ئێران لەبارەی یەکەم رۆژی دانوستاندنەکە دەڵێت، چەندین دەق و پەیام ئاڵوگۆڕ کران. دەشڵێت، باس لە چەندین پرس کراوە، لەوانە "تەنگەی هورمز و پرسی ئەتۆم".
ئاماژەی بەوەش کردووە، داوایان کردووە قەرەبوو بکرێنەوە، هەروەها تەواوی سزاکان لەسەر ئێران هەڵبگیرێن.
ئیسماعیل بەقایی رایگەیاند، "سەرکەوتنی دانوستاندنەکان، پەیوەستە بە دوورکەوتنەوە لە داخوازییە زێدەڕۆ و نایاساییەکان و قبووڵکردنی مافە رەواکانمان".
باسی لەوەش کردووە، ئەزموونی ئەمریکا لە شکاندنی بەڵێنەکانی لەبیرناکەن. دەشڵێت، لە تاوانەکانی ئەمریکا و ئیسرائیل لەکاتی جەنگە سەپێندراوەکەدا، خۆش نابن.
شاندی ئەمریکا پێکهاتوون لە جەی دی ڤانس، جێگری سەرۆکی ئەمریکا و نێردراوان ستیڤ ویتکۆف و جارید کوشنەر. لەلایەنی ئێرانیش محەممەد باقر قالیباف، سەرۆکی پەرلەمان و عەباس عێراقچی، وەزیری دەرەوە. پاکستان نێوەندگیرییان دەکات.
ئەم دانوستاندنانە، بە یەکێک لە گرنگترین و درێژترین دانوستاندنە راستەوخۆکانی نێوان تاران و واشنتن دادەنرێت.