رووداو دیجیتاڵ
ناسنامەی ئەو کەسەی لە میوانداریی پەیامنێرانی کۆشکی سپی و لە نزیک دۆناڵد ترەمپ تەقەی کرد، ئاشکرا دەبێت؛ ئەو مامۆستایەکی لێهاتووی ویلایەتی کالیفۆرنیایە و پێشتر وەک داهێنەرێک دەرکەوتووە.
کۆڵ تۆماس ئاڵن، تەمەن 31 ساڵ، ئەو گەنجەیە کە هێزە ئەمنییەکان وەک تۆمەتباری سەرەکیی تەقەکردنەکەی شەوی شەممە دەستنیشانیان کردووە.
ئاڵن بەچەکەوە، لە نزیک ئەو شوێنەی سەرۆک ترەمپ و بەرپرسانی دیکەی ئەمریکا کۆببوونەوە، دەستگیرکرا.
ئاڵن مامۆستای کۆمپانیای (C2 Education) بووە بۆ وانەی بەهێزکردن.
بابەتی پەیوەندیدار
ئەوەی سەرنجی میدیاکانی راکێشاوە ئەوەیە لە کانوونی یەکەمی 2024 دا لەلایەن هەمان کۆمپانیاوە وەک "مامۆستای مانگ" دەستنیشانکراوە و ستایشی کارەکانی کراوە.
تۆمارە فەرمییەکانی هەڵبژاردنی ئەمریکا (FEC) نیشانی دەدەن کە ئاڵن لە تشرینی یەکەمی 2024دا، 25 دۆلاری بە کەمپەینی کامالا هاریس، کاندیدی دیموکراتەکان بۆ سەرۆکایەتی بەخشیوە.
ئاڵن تەنیا مامۆستا نەبووە، بەڵکو گەشەپێدەرێکی سەربەخۆی یارییە ئەلیکترۆنییەکان بووە و یارییەکی بەناوی (Bohrdom) لەسەر سەکۆی (Steam) بڵاوکردووەتەوە. هەروەها خەریکی پەرەپێدانی دووەم یاریی خۆی بووە بە ناوی (First Law).
تاوەکو ئێستا پۆلیس و لایەنە ئەمنییەکان هیچ روونکردنەوەیەکیان لەبارەی هۆکارەکان و پاڵنەری ئەو مامۆستایە بۆ تەقەکردنەکە بڵاونەکردووەتەوە.