رووداو دیجیتاڵ
سوپای پاسدارانی ئێران راگەیێندراوێکی بڵاوکردەوە و تێیدا دەڵێت، لە ئۆپەراسیۆنێکی بەرفراواندا، چەندین ئامانجی سەربازی و ئابووریی ئەمریکا و ئیسرائیلیان لە ناوچەی کەنداو پێکاوە.
بەگوێرەی راگەیێندراوەکەی سوپای پاسداران، هێزی دەریایی سوپا لە رێگەی مووشەک و درۆنەوە هێرشەکەی ئەنجامداوە و تێیدا "زیانی گەورەی بە بەرژەوەندییەکانی ئەمریکا و ئیسرائیل لە کەنداو و وڵاتانی دەوروبەری گەیاندووە."
سوپای پاسداران دەڵێت، بە مووشەکی بالیستیک و درۆنی خۆتەقێن، شوێنی کۆبوونەوەی فەرماندە و ئەفسەرانی ئەمریکییان لە نزیک بنکەی دەریایی "محەممەد ئەلئەحمەد" لە وڵاتی کوێت بە وردی پێکاوە. لە راگەیێندراوەکەدا هاتووە کە "بینراوە ژمارەیەکی زۆر ئەمبۆڵانس لەو ناوچەیە کۆبوونەتەوە، ئەوەش نیشانەی زۆریی کوژراو و بریندارەکانە."
سوپای پاسداران بانگەشەی ئەوە دەکات کە کەشتییەکی بازرگانیی ئیسرائیلی بە ناوی "کینگ داو ستار" لە نۆکەندی بەندەری "جەبەل عەلی" لە ئیمارات بە مووشەکی کرووزی دەریایی "قەدیر" پێکراوە و ئێستا کەشتییەکە دەسووتێت.
لە راگەیێندراوەکەدا ئاماژە بەوە کراوە کە لە چوارچێوەی "کۆنترۆڵی زیرەکانەی گەرووی هورمز"، رێگری لە هاتووچۆی چەندین کەشتی کراوە کە مۆڵەتیان نەبووە و بەرەو لەنگەرگەکانی رۆژهەڵات و رۆژئاوای گەرووەکە ئاراستە کراون. سوپا داوا لە ستافی کەشتییەکان دەکات تەنیا لە رێگەی کەناڵی 16ی نێودەوڵەتییەوە پەیوەندی بەوانەوە بکەن.