رووداو دیجیتاڵ
یائیر لاپید، سەرکردەی ئۆپۆزیسیۆنی ئیسرائیل، رۆژی چوارشەممە (08-04-2026) بە تووندی رەخنەی لە بنیامین نەتەنیاهوو، سەرۆکوەزیرانی وڵاتەکەی گرت بەهۆی پشتیوانیکردنی لە ئاگربەستە کاتییەکەی نێوان ئەمریکا و ئێران و بە "شکستێکی سیاسی و ستراتیژی" ناوی برد.
لاپید لە هەژماری خۆی لە تۆڕی کۆمەڵایەتیی "ئێکس" نووسیویەتی، "لە مێژووماندا کارەساتی سیاسیی وەهامان نەبینیوە. لە کاتێکدا بڕیار لەسەر کرۆکی ئاسایشی نیشتمانیی ئێمە دەدرا، ئیسرائیل تەنانەت لەوێ ئامادەش نەبوو."
سەرکردەکەی ئۆپۆزیسیۆنی ئیسرائیل ئاماژەی بەوەش کرد کە ساڵانێکی زۆری دەوێ بۆ چاککردنەوەی ئەو "زیانە سیاسی و ستراتیژییانەی" کە نەتەنیاهوو بەهۆی "لەخۆباییبوون، کەمتەرخەمی و نەبوونی پلانی ستراتیژی"یەوە دروستی کردوون.
لاپید جەختی لەوەش کردەوە کە سەرەڕای ئەوەی سوپا و خەڵک ئەرکی خۆیان جێبەجێ کردووە، بەڵام حکومەت لە بەدیهێنانی ئامانجەکانیدا شکستی هێناوە و گوتی، "سوپا هەموو ئەو کارانەی جێبەجێ کرد کە داوای لێ کرابوو، خەڵکیش خۆڕاگرییەکی بێوێنەیان نیشاندا، بەڵام نەتەنیاهوو لە رووی سیاسی و ستراتیژییەوە شکستی هێنا و نەیتوانی هیچ کام لەو ئامانجانە بپێکێت کە بۆ خۆی دیاریکردبوون.
بابەتی پەیوەندیدار
رۆژهەڵاتی نێوەڕاست28/04/2026
سێنتکۆم: هێزە دەریاییەکانی ئەمریکا کەشتییەکی بازرگانییان لە دەریای عەرەب پشکنی
رۆژهەڵاتی نێوەڕاست28/04/2026
حەمید رەزا غوڵامزادە: بەرپرسانی هەرێمی کوردستان بەرپرسیارانە مامەڵەیان کردووە
"
ئەم لێدوانانەی لاپید دوای ئەوە هاتن کە نووسینگەی نەتەنیاهوو رایگەیاند، ئیسرائیل پشتیوانی لە بڕیارەکەی دۆناڵد ترەمپ، سەرۆکی ئەمریکا دەکات بۆ راگرتنی هێرشە سەربازییەکان بۆ سەر ئێران بۆ دوو هەفتە.
بەڵام نووسینگەی نەتەنیاهوو جەختی کردەوە کە ئاگربەستە دوو هەفتەیییەکە "لوبنان ناگرێتەوە."
دۆناڵد ترەمپ بەرەبەیانی چوارشەممە رایگەیاند، لەگەڵ تاران رێککەوتووە بۆ "راگرتنی بۆردوومان و هێرشەکان بۆ سەر ئێران بۆ دوو هەفتە."