رووداو دیجیتاڵ
کیەر ستامەر، سەرۆکوەزیرانی بەریتانیا گەیشتە شانشینی سعودیە، کە ئەمە یەکەم وێستگەی گەشتەکەیەتی بۆ ناوچەی کەنداو بە مەبەستی پشتگیریکردن لە ئاگربەستی جەنگی رۆژهەڵاتی نێوەڕاست.
ئەمە یەکەم سەردانی ستامەرە بۆ ناوچەکە لە سەرەتای دەستپێکردنی جەنگی نێوان ئەمریکا- ئیسرائیل و ئێران لە 28ـی شوبات. سەرۆکوەزیرانی بەریتانیا لەگەڵ محەممەد بن سەلمان، شازادەی جێنشینی سعودیە کۆبووەوە بۆ تاوتوێکردنی رێگەکانی گۆڕینی ئاگربەستی کاتی بۆ ئاشتییەکی بەردەوام.
هاوکات لەگەڵ گەیشتنی سەرۆکوەزیرانی بەریتانیا، وەزارەتی بەرگریی سعودیە لە پۆستێکدا رایگەیاند، سیستمە بەرگرییەکانیان توانیویانە 9 درۆنی بۆمبڕێژکراو لە ئاسمانی وڵاتەکەدا تێکبشکێنن. سعودیە ئاماژەی بە شوێن و ئامانجی درۆنەکان نەکردووە، بەڵام ئەم هێرشانە لە کاتێکدان کە دوو رۆژ لەمەوبەر ئەمریکا و ئێران لە سەر ئاگربەستێکی دوو هەفتەیی رێککەوتوون.
ستامەر پێشوازی لە راگەیاندنی ئاگربەستەکە کرد و گوتی: "ئەمە حەسانەوەیەکە بۆ ناوچەکە و جیهان. پێویستە لەگەڵ هاوبەشەکانمان هەموو هەوڵێک بدەین بۆ پاراستنی ئەم ئاگربەستە و دووبارە کردنەوەی تەنگەی هورمز."
تەنگەی هورمز لەگەڵ دەستپێکی جەنگەوە بە نزیکەیی بە تەواوی داخراوە، کە ئەمەش کاریگەریی گەورەی لە سەر دابینکردنی نەوت، گازی شل و پەین لە ئاستی جیهاندا دروست کردووە.
سەرۆکوەزیرانی بەریتانیا پێکەوە لەگەڵ سەرکردەکانی کەنەدا، ژاپۆن و چەند وڵاتێکی ئەورووپی، راگەیێندراوێکی هاوبەشیان بڵاوکردەوە و تێیدا جەختیان کردەوە، ئامانجی سەرەکی دەبێت گەیشتن بێت بە رێککەوتن بۆ کۆتاییهێنانی یەکجاریی جەنگ لە "رۆژانی داهاتوودا" و تەنیا لەرێگەی دیپلۆماسییەوە.
بەپێی زانیارییەکانی نووسینگەی سەرۆکوەزیران (داونینگ ستریت)، هێزە چەکدارەکانی بەریتانیا لە ماوەی جەنگەکەدا زیاتر لە 110 هێرشی درۆنییان لە ناوچەکەدا پووچەڵ کردووەتەوە. هەروەها هێزی ئاسمانیی شاهانە (RAF) زیاتر لە 1600 کاژێر ئۆپەراسیۆنی بەرگریی ئاسمانیی بۆ پاراستنی هاوبەشەکانی ئەمریکا و وڵاتانی کەنداو کردووە.
گەشتەکەی ستامەر دوای کۆبوونەوەیەکی ئۆنڵاینی پلاندانەرە سەربازییەکانی زیاتر لە 30 وڵات دێت، کە بەریتانیا میوانداریی کردبوو بۆ تاوتوێکردنی چۆنیەتیی پێکهێنانی هاوپەیمانییەکی نێودەوڵەتی بۆ پاراستنی ئاسایشی کەشتیوانی لە تەنگەی هورمز دوای جەنگ.