رووداو دیجیتاڵ
حیزبوڵڵای لوبنان ئاماری چالاکییە سەربازییەکانی بڵاوکردەوە و رایدەگەیێنێت، لە ماوەی 45 رۆژدا زیاتر لە دوو هەزار ئۆپەراسیۆنیان دژی هێزەکانی ئیسرائیل کردووە و دەڵێت، قووڵایی هێرشەکانیان گەیشتووەتە دوای شاری تەلئەڤیڤ.
رۆژی هەینی، 17ـی نیسانی 2026، حیزبوڵڵا لە راگەیێنراوێکدا ئاماژەی بەوە کرد، لە ماوەی نێوان 2ـی ئادار تاوەکو 16ـی نیسانی 2026، لە ژێر ناوی "عەسفول مەئکوول"، 2184 ئۆپەراسیۆنی سەربازییان کردووە، واتە بە تێکڕا رۆژانە 49 ئۆپەراسیۆنی سەربازی.
بەپێی راگەیێنراوەکە، هێرشەکان تەنیا سوپای ئیسرائیلیان لەنێو خاکی لوبنان نەکردووەتە ئامانج، بەڵکو بە مووشەک و درۆن بنکە، سەربازگە و ناوەندە سەربازییەکانی نێو خاکی ئیسرائیلیشیان پێکاوە.
بابەتی پەیوەندیدار
رۆژهەڵاتی نێوەڕاست28/04/2026
سێنتکۆم: هێزە دەریاییەکانی ئەمریکا کەشتییەکی بازرگانییان لە دەریای عەرەب پشکنی
رۆژهەڵاتی نێوەڕاست28/04/2026
حەمید رەزا غوڵامزادە: بەرپرسانی هەرێمی کوردستان بەرپرسیارانە مامەڵەیان کردووە
حیزبوڵڵا دەڵێت، مەودای هێرشەکانیان گەیشتووەتە قووڵایی 160 کیلۆمەتر، کە ناوچەکانی دوای شاری تەلئەڤیڤیش دەگرێتەوە.
حیزبوڵڵا دەڵێت، هێرشەکانیان "وەڵامێک بووە بۆ تاوانەکانی ئیسرائیل بەرامبەر خەڵکی سڤیل" و رایدەگەیێنێت: "چەکدارەکانمان دەست لەسەر پەلەپیتکە دەمێننەوە و ئامادەی هەر ئەگەرێکن. تاوەکو دوایین هەناسە لەسەر بەڵێنی خۆمان بۆ بەرگریکردن لە لوبنان و گەلەکەی بەردەوام دەبین."
ئەمڕۆ هەینی ئاگربەستێکی 10 رۆژە لەنێوان ئیسرائیل و لوبنان چووە واری جێبەجێکردنەوە. هاوکات، دۆناڵد ترەمپ، سەرۆکی ئەمریکا رایگەیاندووە، هەوڵدەدات بۆ یەکەمجار لە مێژوودا دیدارێکی رووبەڕوو لەنێوان سەرکردەکانی هەردوو وڵات لە واشنتن رێکبخات.