رووداو دیجیتاڵ
دوای تەواوبوونی کارەکانی نۆژەنکردنەوەی، جارێکی دیکە گەورەترین فڕۆکەهەڵگری جیهان گەڕایەوە ئاوەکانی رۆژهەڵاتی نێوەڕاست. هاوکات بەرپرسانی سەربازیی ئەمریکا ئاشکرای دەکەن، سێیەم فڕۆکەهەڵگری وڵاتەکەیان بەرەو ناوچەکە بەڕێوەیە.
دوو بەرپرسی سەربازی لە وەزارەتی جەنگی ئەمریکا (پێنتاگۆن) بە ئاژانسی ئەسۆشیەیتد پرێسیان راگەیاندووە، فڕۆکەهەڵگری "یو ئێس ئێس جێراڵد فۆرد" کە پێشتر لە دەریای نێوەڕاست بوو، لە نۆکەندی سوێسەوە پەڕیوەتەوە و ئێستا لەگەڵ هەردوو کەشتیی جەنگیی (یو ئێس ئێس ماهان) و (یو ئێس ئێس وینستن چێرچڵ) لە دەریای سووردا جێگیر بووە.
گەڕانەوەی فڕۆکەهەڵگری "جێراڵد فۆرد" بۆ دەریای سوور دوای ئەوە دێت، زیاتر لە مانگێک لە دەریای نێوەڕاست مابووەوە بەهۆی کەوتنەوەی ئاگرێک لە شوێنی جلشۆرینی ناو کەشتییەکە، کە ناچاری کردن بۆ چاککردنەوە و نۆژەنکردنەوە ناوچەکە جێبهێڵێت.
بابەتی پەیوەندیدار
رۆژهەڵاتی نێوەڕاست28/04/2026
سێنتکۆم: هێزە دەریاییەکانی ئەمریکا کەشتییەکی بازرگانییان لە دەریای عەرەب پشکنی
رۆژهەڵاتی نێوەڕاست28/04/2026
حەمید رەزا غوڵامزادە: بەرپرسانی هەرێمی کوردستان بەرپرسیارانە مامەڵەیان کردووە
ئەم فڕۆکەهەڵگرە ژمارەی پێوانەیی درێژترین ماوەی مانەوەی لە ئەرکدا لەدوای جەنگی ڤێتنامەوە شکاندووە و زۆرترین ماوە لە ئەرکدا بووە.
بە گەیشتنی "جێراڵد فۆرد"، ئێستا ئەمریکا دوو فڕۆکەهەڵگری لە ناوچەکەدا هەیە، کە ئەوی دیکەیان "یو ئێس ئێس ئەبراهام لینکن"ە و لە دەریای عەرەب جێگیر کراوە.
هەر بەپێی گوتەی بەرپرسانی بەرگریی ئەمریکا، فڕۆکەهەڵگری سێیەم کە "یو ئێس ئێس جۆرج ئێچ دەبلیوو بووش"ە، بەرەو رۆژهەڵاتی نێوەڕاست بەڕێوەیە و ئێستا لە کەناراوەکانی باشووری ئەفریقایە.