رووداو دیجیتاڵ
پیرۆزگەى عەباسیی شیعەکان لە عێراق، یەکەم کاروانی کەمپەینی هاوکارییەکانی بۆ هاووڵاتیانى کۆماری ئیسلامیی ئێران رەوانە کرد کە نزیکەی 700 تۆنە.
یەکشەممە 5ی نیسانی 2026، عەلی بەدری، بەڕێوەبەری راگەیاندنی پیرۆزگەى عەباسی بە تۆڕی میدیایی رووداوی گوت: "ئەمڕۆ یەکەم کاروانی هاوکارییەکانمان لە چوارچێوەی کەمپەینی هاوکاریی گەلی ئێران رەوانەی ئەو وڵاتە کرد، کە بەهۆی رووداوەکانی ئەم دواییەی ئێرانەوە زەرەرمەند بوون."
عەلی بەدری رایگەیاند: هاوکارییەکان 690 تۆن بووە کە بە 38 بارهەڵگر رەوانەی ئێران کران، 670 تۆنی خواردن و 20 تۆنى دەرمان بووە.
پیرۆزگەى عەباسی، دامەزراوەیەکی ئایینیی شیعەکانە لە کەربەلا، کە ناوەکەی لە ئیمام عەباس، یەکێک لە کوڕانی ئیمام عەلی وەرگیراوە.
بابەتی پەیوەندیدار
بەڕێوەبەری راگەیاندنى پیرۆزگەى عەباسی گوتی:"ئەو کاروانە هاوکارییە بە هاوئاهەنگی لەگەڵ حکومەتی عێراق رەوانەی ئێران دەکرێت".
لە 24ی ئادارەوە کەمپەینی پیرۆزگەى عەباسی لە عێراق بۆ هاوکاریی گەلی ئێران دەستی پێکرد، کە لەلایەن لیژنەی بەهاناوەچوونی سەر بەو دامەزراوەیەوە سەرپەرشتی دەکرێت.
جەنگی ئێران لەگەڵ ئەمریکا و ئیسرائیل لە 28ی شوباتەوە دەستی پێکردووە، بەهۆیەوە هاووڵاتیانی هەندێک لە شارەکانی ئەو وڵاتە تووشی زەرەر و زیان بوون.