رووداو دیجیتاڵ
دەزگای ئاسایشی نیشتمانیی عێراق رایدەگەیێنێت، لە چەند مانگی رابردوودا سەدان زانیاری و راپۆرتی هەواڵگرییان سەبارەت بە مەترسییەکانی سەر ئاسایشی ناوخۆ رادەستی فەرماندەیی ئۆپەراسیۆنە هاوبەشەکان کردووە. گوتەبێژی دەزگاکەش دەڵێت، چاودێریی وردی دۆخی زیندانەکان و پاراستنی نێردە دیپلۆماسییەکان دەکەن.
ئەرشەد حاکم، گوتەبێژی دەزگای ئاسایشی نیشتمانیی عێراق، رۆژی دووشەممە 6ـی نیسانی 2026، بە تۆڕی میدیایی رووداوی راگەیاند، دەزگاکەیان دەزگایەکی "ئەمنی، هەواڵگری و مەیدانییە" و ئەرکی سەرەکییان بریتییە لە کۆکردنەوەی زانیاری، شیکردنەوەیان و دەستنیشانکردنی هەڕەشەکان بۆ ئەوەی رەوانەی لایەنە پەیوەندیدارەکان و فەرماندەیی ئۆپەراسیۆنە هاوبەشەکانی بکەن بە مەبەستی چارەسەرکردنی هەر کەلێنێکی ئەمنی.
سەبارەت بە دۆخی ئێستای عێراق، ئەرشەد حاکم گوتی: "هاوئاهەنگییەکی بەهێز لە نێوان ئەوان و دەزگا ئەمنییەکانی دیکەدا هەیە بۆ رێگریکردن لە هەر هەڕەشەیەک کە زیان بە ئاسایشی ناوخۆ بگەیێنێت؛ بەتایبەتی لە دۆسیەکانی پاراستنی نێردە بیانییەکان، کارمەندانی بیانی و چاودێریکردنی دۆخی زیندانەکان.
بابەتی پەیوەندیدار
عێراق28/04/2026
عەلی زەیدی چۆن لەنێوان مالیکی و سوودانیدا هەڵبژێردرا؟
عێراق28/04/2026
لە بەغدا 13 ئۆتۆمبێل و چەکێکی زۆری 'ئەبو درع' دەستیان بەسەرداگیرا
"
بەپێی ئەنجوومەنی باڵای دادوەریی عێراق، نێردە دیپلۆماسییەکان (باڵیۆزخانە و کۆنسوڵخانەکان) نوێنەری فەرمیی دەوڵەتانن و پایەی سەرەکیی پەیوەندییە نێودەوڵەتییەکانن. بەپێی رێککەوتنامەی ڤیەننا (1961)، ئەم شوێنانە پارێزبەندییان هەیە و هەر هێرشێک بۆ سەریان بە تاوانێکی مەترسیدار دژی سیستمی نێودەوڵەتی دادەنرێت.
گوتەبێژی دەزگای ئاسایشی نیشتمانی ئاماژەی بەوەش کرد، لە چەند مانگی رابردوودا، سەدان زانیاریی هەواڵگرییان رادەستی فەرماندەیی ئۆپەراسیۆنە هاوبەشەکان کردووە، کە هەڵسەنگاندنی وردیان تێدابووە بۆ مەترسییەکانی سەر ئاسایشی ناوخۆ و رێکاری پێویستیشیان بۆ گیراوەتەبەر.
لەبارەی دۆخی زیندانەکانەوە، ئەرشەد حاکم ئاشکرای کرد کە ناوەندێکی هەواڵگریی تایبەت لە نێو دەزگای ئاسایشی نیشتمانیدا هەیە کە ئەرکی تەنیا چاودێریکردنی هەر کەیسێکە کە پەیوەندیی بە ئاسایشی زیندانەکانەوە هەبێت و هەڵدەستێت بە ئەنجامدانی چارەسەری پێویست بۆ پاراستنی بارودۆخی ناوەندەکانی بەندکردن.