رووداو دیجیتاڵ
بەڕێوەبەری راگەیاندنی فەرماندەیی پاسەوانی سنووری عێراق دەڵێ، قۆناخی یەکەمی دانانی دیواری کۆنکرێتییان لە سنووری سووریا تەواوکردووە کە نزیکەی 400 کیلۆمەترە. لەبارەی هۆکاری دانانی دیوارەکەش لەو سنوورە باس لەوە دەکات، "ناچاری بووە" لەبەر ئەوەی لە دیوی سووریاوە "هیچ هێزێکی رێکوپێک"ـی لێنەبووە.
رۆژی چوارشەممە، 6ـی ئایاری 2026، عەمید حەیدەر کەرخی، بەڕێوەبەری راگەیاندنی فەرماندەیی پاسەوانی سنووری عێراق بە تۆڕی میدیایی رووداوی راگەیاند، ئەمڕۆ "یەکێک لە گەورەترین" قۆناخەکانی دانانی دیواری کۆنکرێتی لە سنووری سووریا تەواوبوو کە درێژییەکەی 400 کیلۆمەترە.
رووبەری سنووری نێوان عێراق و سووریا 618 کیلۆمەترە.
عەمید حەیدەر گوتی: "ئەو 400 کیلۆمەترە لە رەبیعەی پارێزگای نەینەواوە دەستپێدەکات تاوەکو دەگاتە قائیم لە پارێزگای ئەنبار. ئەو بەشەش کە ماوە نزیکەی 200 کیلۆمەترە و لە قائیمەوە بەرەو قەزای وەلید درێژ دەبێتەوە، کە لە قۆناخی دواتردا دەست بە کارکردن لەو سنوورە دەکەین."
لەبارەی دانانی دیوار لە سێگۆشەی سنووری سووریا، تورکیا و عێراق، بەڕێوەبەری راگەیاندنی فەرماندەیی پاسەوانی سنووری عێراق ئاماژەی بەوە کرد کە ئەو بەشە "نزیکەی 18 کیلۆمەترە و تاڕادەیەکی زۆر ئارامە" بۆیە پەلەنەکراوە لە دانانی دیوار و هێڵدراوەتەوە بۆ قۆناخی کۆتایی.
بابەتی پەیوەندیدار
حەیدەر کەرخی گوتی، رێکارەکانیان بۆ پاراستنی سنووری سووریا "ناچاریین" و دەڵێت: "لە دیوی سووریاوە هیچ هێزێکی سووریا نییە کە سنوورەکە بگرێ. ئەم سنوورە مەترسیدارترین ناوچە بوو، چونکە هیچ هێزێکی رێکوپێکی سووریا لە بەرامبەرمان نەبوو."
لەگەڵ تەواوکردنی پڕۆژەی دانانی دیوار، ئەمڕۆ وەزارەتی ناوخۆی عێراق بەردی بناخەی پردی "باغۆز"ی لە "خاڵی سفری سنووری" دانا.
عەمید حەیدەر کەرخی گوتی: "پردی باغۆزی سنووری لە ناوچەی باغۆز دەکەوێتە سەر رووباری فورات. دەکەوێتە یەکەم خاڵی رووباری فورات لە دیوی عێراقەوە و درێژیی پردەکە 360 مەتر دەبێت."
لەبارەی گرنگیی پردەکەوە سەبارەت بە بایەخی ئابووری و سەربازیی پردەکە، بەڕێوەبەری راگەیاندنی پاسەوانی سنوور رایگەیاند: "ئەم پردە خزمەتی هێزەکانی سنوور دەکات لە رووی هاتوچۆوە. پێشتر بۆ ئەوەی لە رووبارەکە بپەڕینەوە دەبوو بچینە نێو شاری قائیم بپەڕینەوە بۆ ئەوبەر."
باسی لەوەش کرد کە پردەکە یارمەتیدەر دەبێت لە خێرا گەیاندنی کۆمەک و پێداویستی خۆراک و هەر دۆخێکی کتوپڕ و گوتی: "سوودێکی زۆری هەیە چ بۆ هێزە ئەمنییەکان، چ بۆ خەڵکی ئەو گوندانەی لەو ناوچەیە نیشتەجێن و کاتێکی زۆریان بۆ دەگەڕێنێتەوە."