رووداو دیجیتاڵ
بایرن میونشن بلیتی گەیشتن بە قۆناخی پێشکۆتایی چامپیۆنزلیگی رفاند، دوای ئەوەی لە یاریی گەڕانەوەی قۆناخی هەشتدا بە ئەنجامی 4-3 لە ریال مەدریدی بردەوە.
لەسەر یاریگای 'ئەلیانز ئارینا'، ریال مەدرید یارییەکی ناوازەی پێشکێش کرد و یانە باڤارییەکە 3 جار ئەنجامەکەی لەگەڵ یانە شاهانەکە یەکسان کردەوە، بەڵام لە دوایین ساتەکاندا خاوەن ماڵ سەرکەوتنی بەدەستهێنا.
ریال مەدرید لە چرکەی 41ـدا لە رێگەی ئاردا گولەرەوە گۆڵی پێشکەوتنی تۆمارکرد. هێرشبەرەکەی ریال سوودی لە هەڵەیەکی کوشندەی مانوێل نۆیەر وەرگرت کە تۆپەکەی بە هەڵە بۆ گولەر نارد، ئەستێرە تورکەکەش تۆپەکەی خستە ناو تۆڕەوە.
بایرن میونشن دەستبەجێ و لە خولەکی 6ـدا لە رێگەی ئەلێکساندەر پافلۆڤیچەوە بە لێدانێکی سەر ئەنجامەکەی یەکسان کردەوە. دوای تێپەڕبوونی 29 خولەک، ریال مەدرید دووبارە لە رێگەی ئاردا گولەرەوە پێشکەوت، کاتێک ئەستێرە لاوەکە بە لێهاتووییەوە لێدانێکی راستەوخۆ تۆماریکرد.
بەڵام بەرگری ریال مەدرید زۆری نەخایاند و بایرن توانی دووبارە ئەنجامەکە یەکسان بکاتەوە لە رێگەی هاری کەین، کە لە ناو ناوچەی سزادا تۆپەکەی وەرگرت و راستەوخۆ ئاڕاستەی گۆڵەکەی لونینی کرد. پێش لە کۆتایی هاتنی نیوەی یەکەم، کیلیان ئێمباپێ توانی گۆڵی سێیەمی ریال مەدرید تۆمار بکات و نیوەی یەکەم بە پێشکەوتنی یانە شاهانەکە 3-2 کۆتایی هات.
لە خولەکی 86ـدا، ئێدواردۆ کاماڤینگا کارتی سووری وەرگرت و ریال مەدرید لە سەختترین کاتی یارییەکەدا بە 10 یاریزانەوە مایەوە.
بابەتی پەیوەندیدار
بایرن میونشن سوودی لە کەمیی ژمارەی یاریزانانی ریال وەرگرت و لە خولەکی 89ـدا لە رێگەی لویس دیازەوە بە لێدانێکی سەرنجڕاکێش گۆڵی سێیەمی تۆمارکرد. لە دوایین ساتەکانی بەر لە فیکەی کۆتاییش، ئۆلیسێ گۆڵی چوارەمی بۆ بایرن زیاد کرد و بلیتی گەیشتنە پێشکۆتایی بۆ تیپەکەی بڕی.
یارییەکە بە سەرکەوتنی بایرن 4-3 کۆتایی هات، بەمەش بە کۆی ئەنجامی هەردوو یاری 6-4 سەرکەوت بۆ چوارگۆشەی زێڕین، دوای ئەوەی لە یاریی چوونیشدا 2-1 بردبوویەوە. بایرن میونشن لە یاریی پێشکۆتاییدا لە یارییەکی بەهێز و چاوەڕوانکراودا رووبەڕووی پاریس سانجێرمان دەبێتەوە.
ئارسیناڵ لە سپۆرتینگ دەرباز دەبێت
یانەی ئارسیناڵ لە سوپرایزێکی دیکە لە رێگەی بەرەو کێبڕکێی نازناوەکانی ئەم وەرزە رزگاری بوو و گەیشتە پێشکۆتایی چامپیۆنزلیگ، دوای یارییەکی زۆر سەخت بەرامبەر سپۆرتینگ.
تیپەکەی میکێل ئارتێتا توانی بلیتی پەڕینەوە بۆ یاریی پێشکۆتایی مسۆگەر بکات دوای یەکسانبوونی بێ گۆڵ 0-0 بەرامبەر سپۆرتینگ لەو یارییەی کە لە لەندەن ئەنجامدرا.
تیپە لەندەنییەکە سوودی لە سەرکەوتنی یاریی چوون وەرگرت کە لە پۆرتوگال بە گۆڵێکی بێبەرامبەر لە رێگەی کای هاڤێرتزەوە تۆماری کردبوو، بەمەش بە کۆی هەردوو یاری 1-0 سەرکەوت.
ئارسیناڵ لە پێشکۆتاییدا رووبەڕووی ئاتلێتیکۆ مەدرید دەبێتەوە، کە بە کۆی ئەنجامی 3-2 لە بارسێلۆنای بردبووەوە.