رووداو دیجیتاڵ
لە سایەی هاوینێکی پڕ لە گۆڕانکاری چاوەڕوانکراو لە ریال مەدرید، ناوی ئێندریک وەک یەکەم گرێبەستی گەڕاوە بۆ ریزەکانی تیپی شاهانە دەردەکەوێت، دوای وەرزێکی ناوازە کە بەخواستن لە یانەی ئۆڵۆمپیک لیۆنی فەرەنسی بەسەری برد.
ئامارە ناوازەکان لە فەرەنسا
هێرشبەرە گەنجە بەرازیلییەکە توانی بەشێوەیەکی نموونەیی سوود لە ماوەی خواستنەکەی وەربگرێت، بەو پێیەی تەنیا 20 یاری لەگەڵ یانە فەرەنسییەکە ئەنجامدا، بەڵام شوێنپەنجەیەکی دیاری جێهێشت بە تۆمارکردنی 8 گۆڵ و دروستکردنی 8 ئەسیست، بەمەش بەشێوەیەکی راستەوخۆ بەشداری لە 16 گۆڵدا کردووە.
لەوەش دیارتر ئەوەیە کە ئێندریک پلەی سێیەمی لە لیستی گۆڵکارانی لیۆن داگیرکرد سەرەڕای ئەوەی لە نیوەی ئەو یارییانەدا بەشداری کردبوو کە هاوڕێکانی ئەنجامیان دابوو، ئەمەش گوزارشت لە توانای بەرزی گۆڵ تۆمارکردن و کاریگەرییەکەی لە کاتێکی کەمدا دەکات.
متمانەی مەدرید بەگەڕانەوەی
لە ناو کۆڕ و کۆبوونەوەکانی یانەی شاهانەدا بڕوایەکی تەواو هەیە کە وەرزی داهاتوو دەبێت گەڕانەوەی ئێندریک بۆ ڤاڵدێبێباس بەشێوەیەکی کۆتایی بەخۆوە ببینێت، لەگەڵ پێشبینی ئەوەی کە ببێتە توخمێکی سەرەکی لە پلانەکانی راهێنەری نوێدا، بەتایبەت لەگەڵ ئەو گەشەسەندنە بەرچاوەی لە چەند مانگی رابردوودا نیشانی داوە.