رووداو دیجیتاڵ
ریال مەدرید دوای شکستەکانی ئەم دواییەی، بەتایبەت ماڵاواییکردن لە چامپیۆنزلیگ بەرامبەر یانەی بایرن میونشن، کەوتووەتە دۆخێکی نادڵنیاوە و پێشبینی دەکرێت ئەلڤارۆ ئەربێلوا، راهێنەری یانەکە لە پۆستەکەی دووربخرێتەوە.
چارەنووسی ئەربێلوا لە مەترسیدایە
بەپێی میدیا نێودەوڵەتییەکان، ئەگەرەکانی مانەوەی ئەلڤارۆ ئەربێلوا لە پۆستی راهێنەرایەتی ریال مەدرید زۆر کەمبوونەتەوە، بەتایبەت کە یانەکە بۆ دووەم وەرزی لەسەریەک لە بردنەوەی نازناوە گەورەکان بێبەش دەبێت. هەرچەندە ئەربێلوا پەیوەندییەکی نزیکی لەگەڵ فلۆرێنتینۆ پێرێز، سەرۆکی یانەکە هەیە، بەڵام نەریتی یانەکە وایە کە راهێنەر بەبێ نازناو ناتوانێت لە پۆستەکەی بەردەوام بێت. ئەربێلوا لە کۆنگرەیەکی رۆژنامەڤانیدا رایگەیاند "داهاتووی من زیاتر پەیوەندی بە پلانی یانەکەوە هەیە نەک بە خۆمەوە، لە ریال مەدرید تەنیا بردنەوەش بەس نییە، چونکە ئاستی داواکارییەکان لە لووتکەدایە".
بەربژێرەکان بۆ شوێنگرتنەوەی ئەربێلوا
ماوریسیۆ پۆچێتینۆ، راهێنەری هەڵبژاردەی ئەمریکا، یەکێکە لە بەربژێرە بەهێزەکان بۆ وەرگرتنی ئەو پۆستە و پێرێز سەرسامە بە تواناکانی.
بابەتی پەیوەندیدار
هەروەها ناوی یۆرگن کڵۆپ، راهێنەری پێشووی لیڤەرپوول دەهێنرێت، هەرچەندە ناوبراو پێشتر ئەو دەنگۆیانەی رەتکردووەتەوە. دیدیێ دیشامپ، راهێنەری هەڵبژاردەی فەرەنساش، ناوێکی دیکەیە کە بۆ دوای مۆندیال خراوەتە نێو لیستەکەوە.
دۆخی یاریزانان و مێرێنگی
جگە لە پرسی راهێنەر، یانەکە بڕیاری داوە گرێبەستی داڤید ئالابا نوێ نەکاتەوە و ئەو بەرگریکارە لە کۆتایی وەرزدا یانەکە جێدەهێڵێت. هاوکات گفتوگۆکان لەگەڵ دانی کارڤاخال و ئانتۆنیۆ رۆدیگیر بەردەوامن. لە لایەکی دیکەوە، راول ئاسێنسیۆ، بەرگریکاری لاوی یانەکە، بەهۆی نەخۆشییەوە گەیێندرایە نەخۆشخانە و هەوڵدەدات بۆ یارییەکانی داهاتوو بگەڕێتەوە.
هاندەرانی ریال مەدرید لەم وەرزەدا ناڕەزایەتییەکی زۆریان دەربڕیوە و لە چەندین یاریی جیاوازدا فیکەی ناڕەزایەتییان بۆ کیلیان ئێمباپێ، ڤینیسیۆس و جود بێلینگهام لێداوە، تەنانەت داوای دەستلەکارکێشانەوەی فلۆرێنتینۆ پێرێزیشیان کردووە.