رووداو دیجیتاڵ
گەورە شارەوانیی ئامەد لە باکووری کوردستان و شارەوانیی یاتا لە شاری خەلیلی فەلەستین، بە فەرمی بوونە شاری دەستەخوشک؛ بەهۆی بارودۆخی شەڕ و ئاستەنگییەکانی هاتووچۆ، مەراسیمی واژۆکردنی پرۆتۆکۆڵەکە بەشێوەی ئۆنلاین بەڕێوەچوو.
لە مەراسیمێکی ئۆنلایندا، سێرا بوچاک و دۆغان هاتون، هاوسەرۆکانی گەورە شارەوانیی ئامەد و جەمیل عەواد، سەرۆکی شارەوانیی یاتا و ئەندامانی ئەنجوومەنی شارەوانییەکە ئامادەبوون و پرۆتۆکۆڵی دەستەخوشکایەتی نێوان هەردوو شارەکەیان واژۆ کرد.
جەمیل عەواد، سەرۆکی شارەوانیی یاتا لە گوتەیەکدا جەختی لەسەر مێژووی هاوبەشی هەردوو نەتەوە کردەوە و رایگەیاند: "گەلی کورد و گەلی فەلەستین بە قۆناخ و تەحەدای مێژوویی هاوشێوەدا تێپەڕیوون. ئەم لێکچوونە پەیوەندییەکی سروشتی لە نێوان هەردوو گەلەکەدا دروستکردووە و ئەم پرۆتۆکۆڵەش ئەو پەیوەندییانە بە دامەزراوەیی دەکات.
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
"
لای خۆشیانەوە، هاوسەرۆکانی گەورە شارەوانیی ئامەد پەیامی ئاشتییان بۆ ناوچەکە نارد و ئاماژەیان بەوە کرد، هێنانەدی ئاشتی لە رۆژهەڵاتی ناوەڕاست بۆ گەلانی کورد و فەلەستین بایەخێکی زۆری هەیە.
سێرا بوچاک و دۆغان هاتون باسیان لەوە کرد، ئەم هەماهەنگییە گرنگییەکی رەمزی و کردەیی هەیە لە بنیاتنانی داهاتوویەکی ئارامدا بۆ هەردوولا.
بەگوێرەی پرۆتۆکۆڵە واژۆکراوەکە، هەردوو شارەوانی لە چەندین بواری جیاوازدا هاوکاریی یەکدی دەکەن، لەوانە: هاوبەشکردنی زانیاری و ئەزموون لە خزمەتگوزارییەکانی شارەوانی، پاراستنی میراتی کولتووری، ئەنجامدانی پڕۆژەی هونەری و پەروەردەیی.
هەروەها رێککەوتنەکە لایەنی تەکنیکیش لەخۆ دەگرێت، وەک کارکردن لەسەر سیستەمی زانیاریی جوگرافی (GIS)، بەرنامەکانی شارە زیرەکەکان، پلاندانانی فریاگوزاری و هەوڵدان بۆ بووژاندنەوەی بازرگانیی ناوخۆیی و رێکخستنی کۆبوونەوە لە نێوان شاندە ئابوورییەکانی هەردوولادا.