رووداو دیجیتاڵ
سەرۆک مەسعود بارزانی، بەبۆنەی هاتنی جەژنی سەری ساڵی ئایینی ئێزدییەکان، پەیامێکی پیرۆزبایی بڵاوکردەوە و رایگەیاند، ئێزدییەکان بەشێکی رەسەنی گەلی کوردستانن و پشتیوانی تەواوی خۆی بۆ داخوازییەکانیان دووپاتکردەوە.
رۆژی سێشەممە، 14ـی نیسانی 2026، سەرۆک مەسعود بارزانی لە پەیامێکدا بەبۆنەی جەژنی سەری ساڵی ئێزدییان (چارشەمبا سۆر)، گەرمترین پیرۆزبایی ئاراستەی ئێزدییەکان لە کوردستان و جیهان کرد و هیوای بەختەوەری و کەیفخۆشی بۆ خواستن.
لە پەیامەکەیدا سەرۆک بارزانی ئاماژەی بە پێگەی ئێزدییەکان کرد و رایگەیاند: "خوشک و برایانی ئێزدی بەشێکی رەسەنی گەلی کوردستانن". هەروەها جەختی لەوەش کردەوە هەمیشە لەگەڵ ئێش و ئازارەکانیاندا بووە و نووسیویەتی: "لەم بۆنەیەدا جەخت دەکەمەوە لەگەڵ ئێش و ئازارەکانتانداین و بە هەموو توانایەکمانەوە پشتیوانی لە داخوازییەکانی خوشک و برایانی ئێزدی دەکەین".
لە کۆتایی پەیامەکەیدا، سەرۆک بارزانی هیوای خواست هەموو جەژن و بۆنەکانیان بە شادی و ئارامی بەسەر ببەن و هەمیشە لە خۆشی و خێردا بن.
جەژنی سەری ساڵی ئێزدییەکان کە بە "چارشەمبا سۆر" ناسراوە، یەکێکە لە جەژنە هەرە کۆن و پیرۆزەکانی ئایینی ئێزدی و ساڵانە لە یەکەم چوارشەممەی مانگی نیسان (بەپێی رۆژژمێری رۆژهەڵاتی) یاد دەکرێتەوە.