رووداو دیجیتاڵ
خوێندکارانی سیستەمی پارالێڵ لە زانکۆ حکومییەکان و خوێندکارانی زانکۆ تایبەتەکان داوای داشکاندنی کرێی خوێندن دەکەن و دەڵێن، بەهۆی ئەوەی زیاتر لە مانگێک دەوام نەکراوە، پێویستە بەشێک لە پارەکەیان بۆ کەمبکرێتەوە. بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا رایدەگەیێنێت، لەماوەی ئەمساڵدا داشکاندن بۆ کرێی خوێندن لە زانکۆ حکومی و تایبەتەکانیش کراوە.
ژمارەیەک لە خوێندکاران و کەسوکاریان پەیوەندییان بە رادیۆی رووداو کردووە، نیگەرانیی خۆیان لە بەرزیی کرێی خوێندن لە زانکۆ تایبەتەکان نیشان دا. دایکی خوێندکارێک لە زانکۆی جیهان لە سلێمانی دەڵێت: "کچەکەم خوێندکارە و زیاتر لە مانگێکە دەوام نەکراوە، کەچی زانکۆ گوشاری لێ دەکات دەبێت قیستی دووەم بدات، ئەگەرنا رێگەی پێنادەن بچێتە تاقیکردنەوەکانەوە. داواکارین هاوشێوەی زانکۆ حکومییەکان، لێرەش داشکاندنمان بۆ بکرێت."
وەزارەتی خوێندنی باڵا: 60 ملیار دینار داشکاندن کراوە
لە وەڵامی ئەم داواکارییانەدا، د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا و توێژینەوەی زانستی بە رووداوی راگەیاند، وەزیری خوێندنی باڵا، هەنگاوی گەورەی بۆ داشکاندنی کرێی خوێندن ناوە، بەڵام زیاتر لە زانکۆ حکومییەکان.
بەڕێوەبەری فەرمانگەی کارگێڕی و دارایی ئاماژەی بەوەکرد، دوای کۆبوونەوەی نائاسایی ئەنجوومەنی وەزارەت کە رۆژی پێنجشەممە، 26ی ئاداری 2026 بەڕێوەچوو، بڕیاردرا بە داشکاندنی کرێی خوێندن بە رێژەی 20٪.
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
لەکاتێکدا پێشتر وەزارەت 45٪ی دیکەی لەکرێی خوێندنی پاراڵێڵ داشکاندبوو.
د. توانا نەجەف گوتی: "لە خوێندنی حکومیدا نزیکەی 65%ـی کرێی خوێندنی پارالێڵ داشکێندراوە، کە کۆی گشتیی پارەکە دەگاتە نزیکەی 60 ملیار دینار و ئەمەش شتێکی کەم وێنەیە بۆ هاوکاریی خێزانە کەمدەرامەتەکان."
یاسا چی دەڵێت لەسەر زانکۆ تایبەتەکان؟
سەبارەت بەوەی بۆچی وەزارەت بڕیاری هاوشێوە بۆ زانکۆ تایبەتەکان دەرناکات، بەڕێوەبەری گشتیی فەرمانگەی کارگێڕی و دارایی روونیکردەوە کە بەپێی یاسای ژمارە 2ی ساڵی 2013، زانکۆ تایبەتەکان لە رووی دارایی و کارگێڕییەوە سەربەخۆن.
د. توانا نەجەف ئاماژەی بەوەش کرد: "وەزیر ناتوانێت بە فەرمی دەستوەردان لە کاروباری دارایی زانکۆ تایبەتەکان بکات، چونکە ئەوان وەبەرهێنانیان کردووە. لەگەڵ ئەوەشدا، زانکۆکان خۆیان بۆ کەمئەندامان، کەسوکاری شەهیدان و ئەو خوێندکارانەی نمرەی بەرزیان هەیە (80 بۆ 90 بەسەرەوە)، داشکاندنی جیاوازیان کردووە کە بڕەکەی دەگاتە ملیۆنان دۆلار، ئەو داشکاندنانەی زانکۆ و پەیمانگە تایبەتەکان کردوویانە نزیکەی 15٪ بووە."
لە کۆتایی قسەکانیدا، ئەو بەرپرسەی وەزارەتی خوێندنی باڵا جەختی لەوە کردەوە کە حکومەت پانتاییەکی فراوانی بۆ خوێندنی بێ بەرامبەر رەخساندووە و ئەمساڵ 60 هەزار کورسیی خوێندنی لە زانکۆ حکومییەکان پەسەند کردووە، تاوەکو بارگرانی لەسەر شانی هاووڵاتییان کەمبێتەوە و ناچارنەبن تەنیا روو لە زانکۆ ئەهلییەکان بکەن.